آئیڈیاز 2022کا دوسرا دن ۔آرمی چیف ، کئی غیرملکی شخصیات کی آمد

آرمی چیف جنرل قمر جاوید باجوہ اپنے دورے کے دوران ملکی اور غیر ملکی اسلحہ ساز کمپنیوں کے اسٹالز پرگئے اور مختلف مصنوعات کا معائنہ کیا۔اسی طرح پاک فضائیہ کے سربراہ ائیر چیف مارشل ظہیر احمد بابر سندھو نے بھی پاک فضائیہ کے اسٹالز کا دورہ کیا۔

نمائش میں شریک غیر ملکی مہمانوں نے پاکستان کی دفاعی مصنوعات میں خصوصی دلچسپی ظاہر کی ہے۔

اس موقع پر الخالد ٹینک کے علاوہ جے ایف 17 تھنڈرطیارہ ، اینٹی کروز میزائل حربہ سمیت پاکستان میں تیار ہونے والا جدید اسلحہ شرکاء کی توجہ کا مرکز بنا ہوا ہے۔

آئیڈیاز 2022 میں پہلی مرتبہ 28 ترک کمپنیوں کی شرکت ایک غیر معمولی واقعہ ہے جسے خصوصی اہمیت دی جارہی ہے۔

واضح رہے کہ ڈیفنس ایکسپورٹ پروموشن آرگنائزیشن کے مطابق 18 نومبر تک جاری رہنے والی 4 روزہ دفاعی نمائش میں دنیا کے 64 ممالک اپنی جدید ترین مصنوعات کے ساتھ شریک ہیں۔ دفاعی شعبے کے ماہرین نمائش میں ملکی اور غیر ملکی مندوبین کی شرکت اور دلچسپی کو خصوصی اہمیت دے رہے ہیں اور ان کا کہنا ہے کہ نجی شعبہ میں دفاعی مصنوعات تیار کرنے والی پاکستانی کمپنیوں کی نمائش میں شرکت بھی اہم ہے۔