پہاڑی غزلاں ناں مجموعہ سولی ٹنگی لو

راشد عباسی ہوراں نی ماء بولی ناں پہلا مجموعہ ”سولی ٹنگی لو“ دکھی تے اسرے خوشی ہوئی جیئاں عیدی نے چن نی خوشی ہونی۔  راشد عباسی ہوراں ماء بولی واستے تھوڑے عرصے وچ بہوں کم کیتا۔ جتھے لوک مال دولت نے پڑہس وچ چہلیاں آر لگے ویے اتھے راشد عباسی ہور ماء بولی کی بچانے ماریوں تیہاڑ رات ہک کرنے پیئے۔

اساں پہاڑ نے بسنیک بہوں بدقسمت یاں جے ساہڑی زبان کی اج تک کسے کھاتے وچ نہا لخیا گا۔ وجہ ساہڑی کم فہمی تے عدم شعور ناء بلکن مجرمانہ غفلت تے احساسِ کمتری آ۔  جسلے تک احساس کمتری کولا اساں جان نیئاں چھوڑانیں اس ویلے تک نہ اساں سر چائی سکنے آں  تے نانہہ یے اپنی ماء بولی کی منوائی سکنے آں۔

کج سال پہلیاں راشد عباسی ہوراں نے نال رلی تے اساں سنگیاں فیصلہ کیتا جے اپنی ماء بولی کی بادھا دینے استے کم کیتا گچھے۔  تے اج الحمد للّٰہ ساہڑے پہاڑی ادیباں نیاں کتاواں چھاپے چڑھن لگی پئیاں۔  تھوڑا مدا ہویا پروفیسر اشفاق کلیم عباسی ہوراں ناں شعری مجموعہ "نویں سویل” چھپی تے ہتھو ہتھ گا۔  میں مسکین نی کتاب "ٹہاکیاں نے پھل” وی عوامی پذیرائی نے درجے ار پہنچی۔  تے ہن ساہڑے سنگی راشد عباسی ہوراں ناں شعری مجموعہ "سولی ٹنگی لو” وی چھپی گا۔ راشد عباسی ہوراں کمال محنت تے ریاضت نال سوہنی شاعری نے اوہ نمونے پیش کیتے جے ہر ورقے اپر بکھرے بکھرے رنگ کھرلے وے۔

اساں پہاڑ نے بسنیکاں کی چائیناں جے ہن تے جاغی گچھاں تے اپنے شاعراں، ادیباں، فنکاراں نی حوصلہ افزائی کراں۔  اساں واستے ضروری آ جے اپنی ماء بولی کی ختم ہونے سی بچانے واستے اپنی نویں نسل کی پہاڑی زبان نال مڑی جوڑاں۔  تے احساس کمتری کولا جان چھڑائی تے اپنی رہتل، قدراں تے روائتاں نے بادھے استے کم کراں۔

راشد عباسی ہور اردو نے وی بڑے منے پرمنے شاعر اے پر اصل چس تے اپنی ماء بولی وچ یے اشنی۔ نالے اوہ کہلیاں ملیاں ہک ہور بڑا کم کرنے پیئے۔ پاکستان وچا پہاڑی زبان ناں پہلوٹھا ادبی رسالہ "رنتن” وی کڈھنے، جس وچ پہاڑی، پوٹھواری، سرائیکی، پنجابی، گوجری شاعری تے نثر شامل ہونی۔ اس نفسانفسی نے دور وچ یوء جہاد کوئی صوفی منش یے کری سکناں۔ راشد عباسی اِس دور نے صوفی اے۔  ساہڑے پاسے وخ صوفی صرف داڑھی آلے کی آخنے پہانویں لکیر نا فقیر کیاں نانہہ ویہہ۔  پر اصل صوفی صفا تھیں ہوناں، جس نا اندر صاف ویہہ تے میں ڈٹھا راشد عباسی اندروں باہروں صاف شفاف ہا۔ اوہ کوئی گل مڑلے وچ ناء رکھناں۔  جیہڑی اس نے دل وچ ہونی اوہ ڈنکے نی چوٹ اپر بائی سٹناں۔ تے  ایہے اساں کی مومن نی نشانی دسی گئی۔
میں اپنی طرفوں اس کتاب نی اشاعت اٌپر نہ صرف راشد عباسی کی بلکن سارے کوہسار کی دل نی گہرائی نال مبارک باد پیش کرنا یاں۔ کیاں جے یوء شعری مجموعہ کسے وی زبان نیں معیاری تے ایوارڈ یافتہ شعری مجموعیاں نے مقابلے وچ پیش کیتا گچھی سکناں۔

میں دعا گو یاں جے اللہ سوہناں راشد عباسی ہوراں کی حیاتی دے تے اوہ اسے طرحے ماء بولی نی خدمت وچ جٌٹے رین تے یاء لو لشکاں مارنی رہ، پاویں آپوں سولی ٹنگی رہ۔ جے لو سولی ٹنگی ویے تے بہوں سارے لوکاں کی لو دینی رہنی تے لو لوایرے ہونے رہنے۔  ان شاءاللہ عنقریب اساں ایبٹ آباد وچ اس "سولی ٹنگی لو” نے لشکارے عام کری تے لوکاں کی دسساں جے لو پہانویں جیہڑے پاسے نی ویہہ اس ناں کم نیہریاں وچ لوکاں کی راہ دسناں ہوناں۔

تساں سارے سنگیاں اگے اپیل ای جے پہاڑی زبان نیں بادھے واستے اپنا حصہ باؤ۔ کتاباں خریدی تے آپو وی پڑھو تے ہور لوکاں کی وی اس پاسے لاؤ۔  شاعر ادیب بزنس مین نیئے ہونے۔ اوہ سرمایہ دار وی نیئے ہونے۔ یقین جانو کئی لخنے والے پائی پائی جوڑی تے کتاب چھاپنے تاں جے ساہڑی ماء بولی زندہ رہ۔ تساں انھاں نیں مشن وچ شامل ہوئی تے اپنی ماء بولی نال محبت ناں عملی ثبوت دیو۔

ہک واری فِر نہ صرف راشد عباسی ہوراں کی شاباش بلکن پہاڑ نے سارے بسنیکاں کی وی ست ست مارکھاں ہون۔

تساں ناں اپنا
شکیل اعوان