سرائے عالمگیر میں تھانیدار پولیس وین میں ڈھولچی لے کر پہنچ گیا

تحریک انصاف کے لانگ مارچ میں اس وقت پنجاب پولیس کا کیا کردار ہے اس کا اندازہ اس بات سے لگایا جا سکتا ہے کہ مارچ کے دوران سرائے عالمگیر میں ایک تھانیدار پولیس وین میں ڈھولچی کو لے کر جلسہ گاہ میں پہنچ گیا۔
موقع پر موجود لوگوں کے مطابق مذکورہ ایس ایچ او جب ڈھولچی لےکر جلسہ گاہ پہنچا تو رہنما ق لیگ عمران بھٹی نےاس پر نوٹ نچھاور کیے۔
جبکہ ایس ایچ او الطاف گوہر نے بھی جواب میں ق لیگ کے مذکورہ رہنما پر نوٹ لُٹا کر حساب برابر کردیا۔ عینی شاہدین کے مطابق ڈھولچی نوٹ پکڑتے ہوئے خوشی میں ایس ایچ او کے نعرے لگاتا رہا۔
واقعہ سوشل میڈیا کے ذریعے سامنے آنےکے بعد پولیس حکام  نے ایس ایچ او کے خلاف کارروائی کا فیصلہ کیا ہے تاہم ذرائع نے امکان ظاہر کیہا ہے کہ مذکورہ پولیس افسر کے خلاف کوئی کارروائی نہیں ہو گی کیونکہ اس نے صوبائی حکومت کے اعلٰی عہدیداروں کی تقلید کی ہے۔