پہاڑی افسانہ۔۔۔ "چنڈ”

تحریر: راشد عباسی

اوہ مری گا۔۔۔ ہک سرکاری ہسپتالے نے میلے جیئے بسترے اپر۔ حالیں اس نی عمر یے کیہہ ایسی۔۔۔۔ صرف تینتی سال۔اوہ بہوں سوہناں جوان سا پر ہیپاٹائٹس سی جیئی ظالم بیماری اس کی کہن آرا کھائی تے مکائی شوڑیا۔ ڈاکٹراں جگر نی پیوند کاری دسی پر اس ناں ابا پھلاں نی ریڑھی لائی تے کہر ناں نظام چلانا ایسا۔ ہتنی بڑی رقم ناں بندوبست اس واستے ممکن نہسا۔ اس بیت المال وچ درخاس چائی دتی۔ پر انھاں دسیا جے منظوری وچ تھوڑا ویلا لگی گیسی۔
گرمیاں نی ہک نسبتا زیادے گرم سناں، ملاقات نیں ویلے نیں دوران اس اپنے داں نکے نکے پتراں کی دلے نال لائی تے بہوں لاڈ کیتا۔ انھاں کی رجی تے پیار دتے نیس۔ تے اسے راتیں اپنی انا کی پھٹ لائے سی بغیر بیت المال یا کسے ہور رفاہی ادارے نی امداد سی پہلیاں یے اس جہان ٹری گا جتھاں اج توڑی کوئی وی مڑی ناء آیا۔
دارالخلافے نیں ہک پنج ستارہ ہوٹلے وچ "ہیپاٹائٹس سی پاک پاکستان” نائیں ناں سیمینار ترے تیہاڑیاں سی جاری سا، جس وچ پورے پاکستان سی علاوہ ہور ملخاں وچا وی ماہرین شریک سے۔ انھاں ساریاں اہم تے معزز شخصیات ناں رہناں سہناں تے کھانا پینا اسے پنج تارہ ہوٹل وچ یے ایسا۔ باہرلے ملخاں چا اشنے والے سارے لوکاں جہاز وچ بزنس کلاس نیں ٹکٹ کہندے سے۔ کج گلوکار تے اداکار وی اس سیمینار ناں حصہ بنے۔ وزارت صحت نیں نمائندے ائیر کنڈیشنڈ ہال وچ مزے مزے نیں کھانیاں، چاء، کافی تے شربت تے ہور بہوں سارے لوازمات سی لطف اندوز ہونیاں اعداد و شمار نے گورکھ دھندے نیں ذریعے میڈیا نیں ساہمنے ہیپاٹائٹس کی ہرانے نیں دعوے کیتے۔
سرکاری ہسپتالے سی تھوڑا جیئیا دور ہک سینما ہال نیں باہر لوکاں نی چنگی لمی قطار گیٹ کھلنے نے انتظار وچ ایسی۔ اس سینمے وچ اج کل فلماں نیں بجائے سٹیج شو ہونیں جنھاں ناں ٹکٹ دو ہزار روپیے فی بندہ آ۔
ہسپتال نیں بلکل ساہمنیاں ہک مشہور وزیرے نال جلوس لنگھناں آ۔ اس جلوسے وچ سو نیں قریب گڈیاں یاں۔ ہک گڈی وچ ساؤنڈ سسٹم لائی تے سٹیج بنایا گا۔ وزیر ہوراں نیں خاص بندے جوشیلیاں تقریراں کری تے وزیر موصوف کی خراج تحسین پیش کرنے جس شہر وچا غربت، جہالت تے بیماریاں ناں خاتمہ کری شوڑیا۔
سرکاری ہسپتالے نیں میلے جیئے بسترے اپر ہیپاٹائٹس سی ناں وائرس جشن منانے کی لگا وہا۔ شہر نیں لوکاں نی بے بسی اپر، وزیراں مشیراں نی منافقت اپر تے شہر وچ بازگشت کرنے والے ساریاں دعویاں، وعدیاں تے نعریاں اپر !!!۔