مری میں برفباری انتظامات کے حوالے سے اجلاس ہنگامہ آرائی کی نذر

مری میں موسم سرما اور خصوصی طور پر برفباری کے دوران ناگزیر انتظامات کے حوالے سے منعقدہ اجلاس ہنگامہ آرائی کی نذر ہوگیا۔  مقامی تنظیموں کے نمائندگان کے ساتھ مبینہ تلخی کے باعث تاجر تنظیموں اور ہوٹل نمائندگان نے اجلاس کا بائیکاٹ کر دیا۔ تاہم بعد میں ڈی سی راولپنڈی احمد حسن رانجھا نے مداخلت کر کے احتجاج ختم کرا دیا ۔
باقاعدہ نوٹیفیکیشن کے تحت مری انتظامیہ کی جانب سے برف باری سیزن میں آٹھ ہزار گاڑیوں سے زائد کو شہر میں داخلے کی اجازت نہ دینے کا فیصلہ کیا گیا ہے۔ تاجر تنظیمیں اور ہوٹل مالکان اس فیصلے سے نالاں ہیں۔ ان کا موقف ہے کہ سیزن کے دوران جب سیاحوں کو کم تعداد میں آنے کا موقع ملے گا تو مقامی روزگار بری طرح متاثر ہوگا۔
تاجر تنظیموں نے دھمکی دی ہے کہ اگر یہ نوٹی فیکیشن واپس نہ لیا گیا تو اس کے خلاف بھرپور احتجاج کا اعلان ہو سکتا ہے۔