پہاڑی زبان ناں شعری مجموعہ "سولی ٹنگی لو”

تحریر: شکیل اعوان

راشد عباسی ہوراں ناں ماء بولی ناں پہلا شعری مجموعہ ”سولی ٹنگی لو“ موصول وہا تے جسرے عیدی نے چن نی خوشی ہونی اسرے خوشی ہوئی۔  راشد عباسی ہوراں ماء بولی استے تھوڑے عرصے وچ بہوں کم کیتا۔ جتھے لوک مال دولت نے چکر وچ لگے ویے اتھے راشد عباسی ہور ماء بولی کی بچانے ماریوں تیہاڑ رات ہک کرنے کی لگے ویے۔

اس پہاڑ نے بسنیک بہوں بدقسمت یاں، جے ساہڑی زبان کی اج تک کسے کھاتے وچ ناء لخیا گا۔  وجہ ساہڑی غفلت، احساس کمتری تے شعور نا کہاٹا آ۔ لوک اپنی ماؤ نی زبان بولنیاں شرمانے اے۔ احساسِ کمتری جد تک ساہڑے وچا ناء گشناں اساں نہ سر چائی سکنے آں تے ناں اپنی ماء بولی کی منوائی سکنے آں۔

راشد عباسی ہوراں تے اساں ہک دو سنگیاں اے وال چائی جے اپنی ماء بولی کی بادھا دینے استے کم کیتا گچھے تے اج الخمدللہ ساہڑے پہاڑی ادیباں نیاں کتاواں  چھپن لگی پیئیاں۔ تھوڑا مٌدا ہویا پروفیسر اشفاق کلیم عباسی ہوراں ناں مجموعہ چھپی چٌکیا تے ہتھو ہتھ گیا۔ میں مسکین نی کتاو ٹہاکیاں نے پٌھل وی عوامی پذیرائی نے درجے ار پہنچی تے ہنڑ ساہڑے سنگی راشد عباسی ہوراں نی کتاو وی اچھی رئی۔

"سولی ٹنگی لو” بہوں معیاری انداز وچ چھپی تے سوہنی شاعری نے رنگ بکھرے وے۔ اس مجموعے وچ ساریاں غزلاں شامل یاں۔ شاعر نکیاں بڑیاں ساریاں بحراں برتیاں۔ عروض نیں حوالے نال وی چنگی شاعری ای۔ تے پاکستان نیں بڑے بڑے شاعراں ادیبوں اس نی بہوں تعریف کیتی۔

اساں پہاڑ نے بسنیکاں کی چائیناں جے ہن تے جاغی گچھاں تے اپنے شاعراں، ادیباں، فنکاراں نی حوصلہ افزائی کراں۔  تے اپنی ماء بولی کی ختم ہونے سی بچاں۔ اپنی نویں نسل کی پہاڑی زبان آلے پاسے ٹوراں تے اپنیاں قدراں، روایتاں تے لوک رہتل نے بادھے استے کم کراں۔

راشد عباسئ ہور اردو نے وی بڑے منے پرمنے شاعر اے پر اصل چس اپنی زبان وچ یہہ اشنی۔ راشد عباسی ہور کہلیاں مٌلیاں اتنا بڑا کم کرنے اے۔ اوہ ہک ادبی رسالہ "رنتن” وی کڈھنے جس وچ پہاڑی سی علاوہ پوٹھواری، سرائیکی تے پنجابی شاعراں نیاں لختاں شامل ہونیاں۔   اس نفسانفسی نے دور وچ ایہے جیہا جہاد کوئ صوفی منش ہی کری سکناں۔

راشد عباسی اِس دور نے صوفی اے۔  ساہڑے پاسے وخ صوفی صرف داڑھی آلے کی آخنے پہاویں لکیر نا فقیر ویہہ۔ پر اصل صوفی صفا تھیں ہوناں، جس نا اندر صاف ویہہ۔  میں ڈہٹھا جے راشد عباسی اندروں باہروں صاف شفاف آ۔  کوئ گل مڑلے وچ ناء رکھناں، جیہڑی دل وچ ہونی بائ سٹناں۔ تے یاء مومن نی نشانی دسی گئی۔

میں اپنی طرفوں اس کتاو نی اشاعت اٌپر دل نی گہرائی نال مبارک باد پیش کرنا یاں تے دعا کرناں یاں جے اللہ سوہنیں راشد عباسی ہوراں کی حیاتی دے تے اسے  طرحے ماء بولی نی خدمت وچ جٌٹے رہن تہہ اے لو لشکاں مارنی رہ، پہانویں سٌولی ٹنگی رہ۔

جے لو سٌولی ٹنگی ویہہ تے بہوں سارے لوکاں کی لو دینی رینی تے لو لویرے ہونے رینے۔  انشاللہ عنقریب اساں ایبٹ آباد وچ اس سٌولی ٹنگی لو نے لشکارے مرواساں
تے لوکاں کی دسساں جے لو پہانویں جیہڑے پاسے نی ویہہ،  اس ناں کم نیہریاں وچ لوکاں کی راہ باہناں ہوناں۔

تٌساں سارے دوستاں اگے اپیل ای جے پہاڑی زبان نے بادھے واستے اپنا حصہ باؤ۔ کتاباں خریدی تے پڑھو کیاں جے شاعر ادیب بزنس مین نیہے ہونے۔ اوہ پائی پائی جوڑی تے کتاو چھاپنے تے تٌساں نی ماء بولی کی زندہ رکھنے۔  ہک واری فِر راشد عباسی ہوراں کی ست ست مارکھاں تے پہاڑ نے بسنیکاں کی وی مارکھاں ہون۔