لانگ مارچ ڈیوٹی سے غائب اسلام آباد پولیس کے دو درجن اہلکار برطرف

اسلام آباد پولیس کے دو درجن کے قریب اہلکاروں کو لانگ مارچ کے دوران ڈیوٹی سے غیر حاضری پر برطرف کر دیا گیا ہے۔

رپورٹ کے مطابق ان اہلکاروں کو تحریک انصاف کے ممکنہ لانگ مارچ کے پیش نظر ریڈ زون سمیت مختلف مقامات پر تعینات کیا گیا تھا۔ تاہم انھوں نے سرکاری احکامات پر عمل درآمد نہیں کیا اور ڈیوٹی پر حاضر نہیں ہوئے ۔

اسلام آباد پولیس کے حکام کے مطابق برطرف کیے جانے والوں میں کانسٹیبل اور ہیڈ کانسٹیبل شامل ہیں۔ جب چیکنگ کے نتیجے میں معلوم ہوا کہ مذکورہ اہلکار اپنے ڈیوٹی پوائنٹس سے غائب تھے. بعد ازاں ایس ایس پی آپریشنز نے انہیں فرائض سے غفلت برتنے پر برطرف کر دیا۔

ذرائع کا کہنا ہے کہ جن اہکاروں کو برطرف کیا گیا ہے وہ ابھی تک اپنی برطرفی سے آگاہ نہیں ہیں کیوں کہ ان کی برطرفی کا حکم زبانی طور پر فون پر جاری کیا گیا ہے۔

تاہم برطرف کیے جانے والے اہلکاروں کو یہ حق حاصل ہو گا کہ وہ سزا کے خلاف ڈی آئی جی آپریشنز کو اپیل دائر کر سکتے ہیں۔

دوسری طرف اسلام آباد پولیس کے تعلقات عامہ کے افسر نے اس معاملے پر کوئی تبصرہ کرنے سے معذرت کرلی۔