ملک میں اپنی نوعیت کی پہلی عالمی چلڈرن کانفرنس

کانفرنس میں 26زبانوں کے 150ماہرین شریک ہیں جن میں 20غیر ملکی مندوبین بھی شامل ہیں۔وزیراعظم کے مشیر انجنیئر امیر مقام افتتاحی نشست کے مہمان خصوصی تھے۔ انہوں نے اپنے خطاب میں کہا کہ ادیب اور لکھاری ملک و قوم کی خاطر بچوں کے ادب تخلیق کرنے کی روایت کو فروغ دیں۔ ہم آج قومی سطح پر بہت سے مسائل سے نبرد آزماہیں۔ ہم اپنے بچوں کے کردار اور اخلاق کی آج حفاظت کریں گے، تو یہ کل کوپوری قوم کے کردار کی حفاظت کا فر یضا انجام دیں گے۔ یہ ہمارے لکھنے والوں کی ذمہ داری ہے کہ وہ بچوں کا ادب تخلیق کرتے ہوئے اسلام کے اصولوں اور ہماری مشرقی اعلی انسانی اقدار کو ملحوظ خاطر رکھیں۔حب الوطنی کا بھرپور جذبہ بچوں میں اسی عمر میں پیدا کیا جا سکتا ہے۔ڈاکٹر یوسف خشک،چیئرمین، اکادمی نے خطبہ استقبالیہ پیش کرتے ہوئے کہا کہ بچوں کی تربیت کے لیے جو وسائل ہمیں درکار ہیں ان میں ادب کا وسیلہ سب سے موثر اور کارگر ہے۔ ادب نہ صرف بچوں کی تربیت کے ایک آلے کے طور پر کام کرتا ہے اور ان کے کردار اور اخلاق کی تعمیر میں کردار ادا کرتا ہے۔نامور صحافی اور ادیب ودانش ورمحمود شام نے65سال پہلے کے بچوں کے رسائل، اخبارات کاذکر کیا۔انہوں بچوں کے رسالوں اور مواد کو ڈیجیٹلائز ڈکرنے اور سرکاری لائبریریوں کو ثقافت ڈویژن کے تحت ڈیجٹلائزڈکرنے پر زور دیا۔ انہوں نے کہا کہ بچوں کے لیے الگ چینل قائم ہوناچاہیے جو صرف بچوں کے حوالے سے پروگرام دکھائے۔ امجد اسلام امجد نے کہا کہ پی ٹی وی واحد چینل ہے جو شروع سے بچوں  کے پروگرام کرتار ہا ہے۔ بچوں کی سو چ اور کام کو اہمیت دینے کی ضرورت ہے۔ پرائمری سے مڈل تک بچوں کو اپنی زبان میں پڑھانا چاہیے۔انہوں نے کہا کہ بچوں  کے لیے ایسے ادب کی ضرورت ہے جس سے وہ سچا، بہادر، اور بہتر فیصلہ کرنے والا انسان بن جائے۔ مہمان اعزاز سینیٹر عرفان صدیقی نے کہاکہ بچوں پر خصوصی توجہ دینے سے آئندہ دس سال میں ہمارے بچے بھی دنیا کے بچوں کے ہم پلہ ہو سکیں گے۔ فارینہ مظہر، وفاقی سیکرٹری، قومی ورثہ و ثقافت ڈویژن،نے اظہار تشکرپیش کیا۔