عبدالباسط عباسی یوسی پلک کا ہیرو

عبدالباسط عباسی ولد امان اللہ عباسی کا تعلق
مولاچھ، پلک سے ہے۔ الحمد للہ ان کو انٹرنیشنل انڈر 19
سکواڈ میں شامل کر لیا گیا ہے۔ بنگلہ دیش کے خلاف سیریز میں عبدالباسط عباسی ان شاء اللہ چار روزہ میچوں اور ون ڈے میں ایکشن میں نظر آئیں گے۔

یوسی پلک کا یہ پہلا نوجوان ہے جو کرکٹ کے میدان میں ملک کا نام روشن کرنے کی لگن لیے قومی سطح پر منتخب ہونے میں کامیاب ہوا ہے۔ اس کامیابی میں بلاشبہ اس نوجوان کی اپنی محنت و ریاضت کا بھی بڑا ہاتھ ہے لیکن اس کے ساتھ ساتھ اس کے گھر والوں کے بھرپور تعاون نے بھی اس کی کامیابی میں اہم کردار ادا کیا ہے۔

عبدالباسط کا بڑا بھائی شفقت عباسی بھی ٹینس کرکٹ میں خطہ کوہسار کا ایک درخشاں ستارہ ہے۔ ان نوجوانوں نے یہ ثابت کیا ہے کہ ہمارے علاقے میں ٹیلنٹ کی کمی نہیں ہے لیکن بدقسمتی سے سہولیات کا فقدان ہے۔ نیز یہ ہمارے نمائندگان کی نااہلی بھی ہے کہ پورے علاقے میں کھیلوں کا کوئی سٹیڈیم تعمیر نہیں کیا گیا۔ اگر سہولیات کا فقدان نہ ہوتا تو آج تک کئی عبدالباسط منظر عام پر آ چکے ہوتے۔

میں کوہسار نیوز کے توسط سے باسط عباسی اور اس کے اہل خانہ کو اپنی طرف سے اور پورے علاقے کی طرف سے مبارک باد پیش کرتا ہوں۔ مجھے امید ہے کہ یہ موقع ہمارے دیگر نوجوانوں کے لیے بھی سنگ میل ثابت ہو گا۔

میں اس نوجوان کو کرکٹ کھیلتے ہوئے دیکھتا تو پڑوسی ہونے کے ناطے مجھے اس کی صلاحیتوں پر رشک آتا تھا۔ مجھے بے انتہا خوشی ہے کہ میرا یہ عزیز ایک بڑے پلیٹ فارم پر پہنچنے میں کامیاب ہوا۔ ہماری دعا ہے کہ عبدالباسط کو اللہ پاک مزید کامرانیوں سے نوازے تاکہ وہ ملک کے ساتھ ساتھ علاقے کا بھی نام عالمی سطح پر روشن کرے۔