کامسیٹس یونیورسٹی ایبٹ آباد کیمپس میں کانووکیشن کل ہو گا

کانووکیشن کی تقریبات دوحصوں پر مشتمل ہونگی۔ پہلی تقریب صبح 9بجے شروع ہو کر دوپہر12بجے تک جاری رہے گی جبکہ دوسری تقریب بعد از دوپہر شروع ہو کر سہ پہر کو اختتام پذیر ہوگی۔ ڈائریکٹر کامسیٹس ایبٹ آباد پروفیسر ڈاکٹرمحمدمعروف شاہ نے میڈیا کو بتایا کہ فارغ التحصیل طلبہ ان کے والدین اور مہمانوں کے لئے شایان ِشان انتظامات کیے جائیں گے ڈائریکٹر کامسیٹس ایبٹ آباد نے اعزاز حاصل کرنے والے طلبہ کو ان کے تعلیمی سفر کی کامیاب تکمیل پرمبارک باد دی۔

انہوں نے مزید بتایا کہ کامسیٹس یونیورسٹی میں اخلاق اور کردار کے زیور سے بھی آراستہ کرنے کاخصوصی اہتمام کیا جاتاہے۔ انہوں نے والدین کی بھی تعریف کی جنہوں نے اپنے بچوں کی تعلیم کے لئے بین الاقوامی معیار کے اعلیٰ تعلیمی ادارے کا انتخاب کرکے بچوں کے مستقبل کو سنوارنے میں اپنا کردار ادا کیا۔ 25اکتوبر2022کو منعقد ہونے والے کانووکیشن میں کل1200سے زائد طلبہ و طالبات کو ڈگریاں تعلیمی سفر کے دوران نمایاں کارکردگی کامظاہرہ کرنے والے 48طلبہ کو گولڈ، سلور اور براؤنز میڈلز عطا کئے جائیں گے۔ ان تقریبات کی خاص بات یہ ہے کہ 24ریسرچ سکالرز کوتمام ضروریات پوری کرنے پر پی ایچ ڈی کی اعلیٰ ترین ڈگری سے نوازا جائے گا۔  یونیورسٹی انتظامیہ کے مطابق صبح کی تقریب میں 622 طلبہ و طالبات اور ان کے علاوہ ان کے والدین کو مدعو کیا جائے گا۔ جبکہ بعد از دوپہر کی تقریب میں 588طلبہ و طالبات، انکے والدین اور مہمان شرکت کریں گے۔ اس سلسلے میں یونیورسٹی کوخاص انداز میں سجانے کاہتمام کیا گیا تاکہ ان تقریبات کو طلبہ و والدین کے لئے یاد گار بنایا جاسکے۔