بچے سے زیادتی کا معاملہ ۔۔کیڈٹ کالج مری کے پرنسپل کی وضاحت آگئی

کیڈٹ کالج گھوڑا گلی میں پیش آنے والے واقعے پر پرنسپل پروفیسر آفتاب احمد نے ایک وضاحتی بیان جاری کیا ہے جس میں انہوں نے ساتویں جماعت کے طالب علم کے ساتھ مبینہ زیادتی کے واقعے کو انتہائی افسوس ناک اور قابل مذمت قرار دیا تاہم ان کا کہنا ہے کہ سوشل میڈیا پر واقعات کو توڑ مروڑ کر پیش کیا جا رہا ہے ۔ اپنے ویڈیو بیان میں پروفیسر آفتاب احمد نے کہا کہ کالج کے سب بچے میرے لیے برابر ہیں۔ کیڈٹ کالج مری ایک مقدس درس گاہ ہے، جو گزشتہ 20 برس سے تعلیمی خدمات انجام دے رہی ہے اور اس کے اندر کسی بھی قسم کی غیر اخلاقی اور مذموم حرکت کو برداشت نہیں کیا جاسکتا۔
ان کا کہنا تھا کہ جن بچوں پر الزام لگایا گیا ہے ان کی طبی رپورٹ آنے کے بعد اگر جرم ثابت ہوتا ہے تو ان کے خلاف سخت ترین کارروائی ہونی چاہیے تاہم اگر ایسا نہیں ہوتا تو انہیں بھی انصاف ملنا چاہیے ۔ کالج انتظامیہ کی جانب سے پولیس اور متعلقہ اداروں کے ساتھ بھرپور تعاون کیا جا رہا ہے۔ آفتاب احمد کا مزید کہنا تھا کہ ہم مظلوم بچے کے ساتھ کھڑے ہیں ، جہاں تک اس الزام کا تعلق ہے کہ پرنسپل نے واقعے کو دبانے کی کوشش کی ، یہ سراسر غلط ہے کیونکہ بچہ ہنسی خوشی چھٹی لے کر اپنے والدین کے ساتھ گیا تھا تھا، اس حوالے سے نہ تو کوئی زبانی اور نہ تحریری شکایت کالج انتظامیہ کے علم میں لائے گئی۔
پرنسپل کا مزید کہنا تھا کہ کالج کے اندر کیمروں کا مربوط سرویلنس نظام موجود ہے جس کی موجودگی میں اس قسم کا جرم سرزد کرنا آسان نہیں تاہم تحقیقات کے نتیجے میں جس پر بھی جرم ثابت ہو گا اس کے خلاف بھرپور کارروائی کی حمایت کریں گے ۔