الیکشن کمیشن آف پاکستان نے توشہ خانہ ریفرنس میں پاکستان تحریک انصاف کے سربراہ عمران خان کو پانچ سال کے لئے نااہل قرار دے دیا ہے۔
چیف الیکشن کمشنر سکندر سلطان راجہ کی سربراہی میں 4 رکنی بینچ نے جمعہ کو متفقہ فیصلہ سنایا۔
الیکشن کمیشن کی جانب سے سنائے گئے فیصلے میں کہا گیا ہے کہ تحریک انصاف کے سربراہ عمران خان رکن قومی اسمبلی نہیں رہے، عمران خان کی جانب سے جمع کرایا گیا جواب درست نہیں تھا، عمران خان کرپٹ پریکٹس میں ملوث رہے ہیں،لہٰذا ان کی قومی اسمبلی کی نشست کو خالی قرار دیا جاتا ہے۔
دوسری طرف پاکستان تحریک انصاف نے فیصلے پر سخت ردعمل ظاہر کرتے ہوئے کہا ہے کہ ہم فوری طور پر اسے اسلام آباد ہائی کورٹ میں چیلنج کریں گے۔
فواد چودھری نے اپنے فوری ردعمل میں کہا کہ یہ فیصلہ 22 کروڑ عوام کے منہ پر طمانچہ ہے۔۔ انہوں نے عوام اور تحریک انصاف کے کارکنوں سے اپیل کی کہ وہ باہر نکلیں اور یہ فیصلہ تبدیل کرانے کیلئے اپنا کردار ادا کریں
