مری سے تعلق رکھنے والا نعمان عباسی راولپنڈی میں قتل

اس حوالے سے ملنے والی تفصیلات کے مطابق نعمان عباسی اور اس کے والد گل فراز عباسی  ایک مقدمے کے سلسلے میں راولپنڈی کی ایک عدالت میں پیشی کے بعد واپس آرہے تھے کہ پرانے ایئرپورٹ تھانے کی حدود میں  گھات لگائے ملزمان نے ان پر اندھا دھند فائرنگ کر دی جس کے نتیجے میں 28 سال نعمان عباسی  موقع پر جاں بحق جبکہ اس کے والد  گل فراز عباسی شدید زخمی ہوگئے جنہیں مقامی اسپتال میں داخل کرایا گیا ہے جہاں ان کی حالت تشویشناک بتائی جاتی ہے۔ ذرائع کے مطابق واقعہ پرانی دشمنی کا نتیجہ  ہے جس میں مقدمے کا دوسرا فریق ملوث بتایا جاتا ہے۔ پولیس نے مقدمہ درج کر کے تفتیش شروع کر دی ہے۔

خاندانی ذرائع کے مطابق نعمان کا اس مقدمے سے بھی کوئی تعلق نہیں تھا جس میں نامزدگی کی وجہ سے وہ پیشیاں بھگت رہا تھا، اسے جان بوجھ کر دشمنی کی بنیاد پر نامزد کیا گیا تاکہ اس کا کیریئر تباہ ہو جائے اور گذشتہ روز  بالآخر وہ اپنی زندگی سے ہی ہاتھ دھو بیٹھا۔ وہ طویل عرصے سے ملازمت کے سلسلے میں سعودی عرب میں مقیم تھا تاہم مقدمے بازی کی وجہ سے اس کی واپسی ممکن نہیں ہو سکی۔

بدھ کی شب نعمان عباسی کی میت پنڈوڑیاں اسلام آباد میں واقع اس کے گھر لائی گئی تو ہر آنکھ اشکبار تھی۔ نعمان کی شادی دو برس قبل ہوئی تھی اور اس کے بیٹے کی عمر صرف سات ماہ بتائی جاتی ہے۔ نعمان کی نماز جنازہ آج بروز جمعرات صبح گیارہ بجے ادا کی جائے گی۔