نشتر اسپتال شعبہ اناٹومی کی سربراہ سمیت 8 افراد معطل

ملتان کے نشتراسپتال  کی چھت پر گذشتہ دنوں لاوارث لاشوں کی بےحرمتی کے واقعے کی تحقیقات کے نتیجے میں اہم پیش رفت ہوئی ہے جس کے بعد غفلت کے ذمہ دارنشتراسپتال کے شعبہ اناٹومی کی سربراہ  ڈاکٹر مریم اشرف اور2 تھانیداروں  سمیت 8 افراد کو معطل کردیا گیا۔

اس سلسلے میں وزیراعلیٰ پنجاب چوہدری  پرویزالٰہی کی صدارت  میں ایک اہم اجلاس ہوا جس میں نشتراسپتال کے المناک  واقعے سے متعلق ابتدائی انکوائری رپورٹ پیش کی گئی۔

وزیراعلیٰ نے  صورت حال کا جائزہ لینے کے بعد  اسپتال کے شعبہ اٹانومی کی سربراہ پروفیسرڈاکٹرمریم اشرف، ڈاکٹرعبدالوہاب اورڈاکٹرسیرت عباس کوعہدوں سےہٹانے کا حکم دیا جبکہ ان  کے علاوہ نشترمیڈیکل یونیورسٹی ملتان کے تین  ملازمین غلام عباس،محمد سجاد ناصراورعبدالرؤف کو بھی معطل کردیاگیا۔

علاوہ ازیں وزیر اعلٰی پرویز الٰہی نے ایس ایچ اوتھانہ شاہ رکن عالم کالونی عمرفاروق اورایس ایچ او تھانہ سیتل ماڑی سعیدسیال کو بھی معطل کرنے کا حکم جاری کیا ہے۔

ذرائع کا کہنا ہے کہ وزیراعلیٰ نے غفلت کے مرتکب افراد  کے خلاف پیڈا ایکٹ کے تحت بھی کارروائی کا حکم دیا اور کہا کہ کسی بھی صورت میں لاشوں کے ساتھ ایسابرتاؤ قبول نہیں کیا جا سکتا ، ان کا مزید کہناتھا کہ  اس گھناؤنے واقعے کی جتنی بھی مذمت کی جائے کم ہے۔