پولیس سے جھڑپ،تحریک لبیک کیخلاف مقدمات درج۔ 34 گرفتار

اس حوالے سے  ایبٹ آباد پولیس حکام کیی جانب سے جاری کردہ اعلامیے میں کہا گیا ہے کہ 16 اکتوبر بروز اتوار ایک مذہبی تنظیم نے سعد حسین، مفتی شفیق امینی اور قاری عمیر الزاری کی قیادت میں تقریباً 6 سے سات ہزار افراد پر مشتمل ایک جلوس نکالا ، جس میں چھ ساڑھے چھ سو گاڑیاں شامل تھیں،  یہ تمام لوگ  ایبٹ آباد میں دفعہ 144 کی خلاف ورزی کرتے ہوئے داخل ہوئے جس پر انتظامیہ کی طرف سے مقامی عمائدین جن میں ڈی آر سی ممبران، امن کمیٹی، علمائے کرام، تاجران،نے امن و امان کی صورتحال کو برقرار رکھنے کے لیے مذہبی تنظیم کے رہنماؤں سے مذاکرات کی کوشش کی، لیکن انہوں نے مذاکرات سے انکار کر دیا اور ڈیوٹی پر موجود 33پولیس افسران اور جوانوں کو، فائرنگ، لاٹھیوں، ڈنڈوں، غلیلوں اور  کانچوں سے حملہ کرکے شدید زخمی کر دیا، جبکہ پولیس سمیت دیگر کئی پرائیوٹ گاڑیاں اور موٹر سائیکلیں نزر آتش کر دیں۔ اس کے علاوہ  بھاری مقدار میں اسلحہ ایمونیشن لے کر فرار ہو گئےجبکہ 5 سرکاری ملازمین کو بھی اغواء کر لیا جنہیں بعد میں بازیاب کرا لیا  گیاتھا۔

اعلامیے کے مطابق اس پر مذہبی جماعت کے رہنماوں کے خلاف تھانہ حویلیاں میں مقدمہ درج  کرتے ہوئے 34 ملزمان کو موقع سے گرفتار کر لیا گیا ۔تھانہ حویلیاں میں مقدمہ زیر دفعات پی پی سی،324/436/153A/353/365/188/189/147/148/149/341/427 اور 7 اے ٹی اے کے تحت درج کیا گیا ۔