لال حویلی خالی کرنے کےحکم پرشیخ رشید کو بندگلی یاد آ گئی

واضح رہے کہ شیخ رشید اور ان کے بھائی شیخ صدیق کو متروکہ وقف املاک راولپنڈی نے سات روز کے اندر لال حویلی خالی کرنے کا نوٹس جاری کر دیا ہے۔
اس سلسلے میں ضروری کارروائی کے لئے ڈپٹی ایڈمنسٹریٹر وقف املاک آصف خان نے ڈی سی راولپنڈی کو پولیس کی معاونت فراہم کرنے کے لئے خط بھی لکھ دیا ہے ۔ خط میں کہا گیا ہے کہ سات اراضی یونٹس خالی کرانے کیلئے 19 اکتوبر کو پولیس کی مدد درکار ہو گی ۔ خط میں یہ بھی کہا گیا ہے کہ لال حویلی سمیت متروکہ وقف املاک کے سات یونٹس کی متعدد سماعتیں ہوچکی ہیں جن میں شیخ رشید اور ان کے بھائی سے شیخ صدیق کوئی بھی مستند دستاویز پیش نہیں کر سکے ۔

دوسری طرف راولپنڈی میں پریس کانفرنس سے خطاب کرتے ہوئے عوامی مسلم لیگ کے سربراہ شیخ رشید احمد نے کہا ہے کہ حالات بند گلی کی طرف جا رہے ہیں۔ 30 اکتوبر تک بہت کچھ واضح ہو جائے گا ۔حکومت کتنے بھی کنٹینرز لگا لے انقلاب آ کر رہے گا۔
شیخ رشید نے توقع ظاہر کی کہ ضمنی الیکشن کے بعد عمران خان لانگ مارچ کی کال دیں گے ۔ انہوں نے ایک بار پھر عمران خان کو اکسانے کے انداز میں کہا کہ عوام توقع رکھتے ہیں کہ آر یا پار کرو ۔ ان کا کہنا تھا کہ پاکستان کی فوج اپنے لوگوں پر گولی نہیں چلاسکتیں کنٹینرز کی دیواروں کے باوجود انقلاب آ کر رہے گا ۔
شیخ رشید نے مزید کہا کہ کوئی جتنی مرضی ویڈیوزاورآڈیوز لے آئے عمران خان کو کچھ نہیں ہوگا ۔میں عمر کے اس حصے میں بھی عمران خان کے ساتھ ہوں۔