سینٹورس مال ڈی سیل نہ کرنے پر ہڑتال کی دھمکی

راولپنڈی اسلام آباد کے تاجروں نے سینٹورس مال کو ڈی سیل نہ کرنے کی صورت میں ہڑتال اور احتجاج کی دھمکی دے دی ہے۔
تفصیلات کے مطابق آتش زدگی کا شکار ہونے والے سینٹورس مال اسلام آباد میں راولپنڈی اسلام آباد کی تاجر برادری کا گرینڈ نمائندہ اجلاس منعقد ہوا جس میں اسلام آباد اور راولپنڈی چیمبرز آف کامرس اینڈ انڈسٹریز، راولپنڈی اسلام آباد سمال چیمبرز آف کامرس اینڈ انڈسٹریز ، آل پاکستان انجمن تاجران ، تنظیم تاجران پاکستان ، ریٹیلرز ایسوسی ایشن آف پاکستان ، فرنیچر ایسوسی ایشن آف پاکستان اور راولپنڈی اسلام آباد کی تمام مارکیٹوں کے نمائندگان نے بڑی تعداد میں شرکت کی۔
آل پاکستان انجمن تاجران اسلام آباد کے ترجمان شاہد عباسی کے مطابق اجلاس میں تمام شرکا نے آتشزدگی کے واقعہ پر سی ای او سینٹورس مال اسلام آباد سردار یاسر الیاس خان سے اظہار ہمدردی کیا اور سینٹورس مال اسلام آباد کو اسلام انتظامیہ کی جانب سے بلا جواز سیل کرنے ،تاجر برادری کے ساتھ ظلم و ناانصافی اور ناروا سلوک رکھنے پر سخت الفاظ میں مذمت کی اور کہا کے حکومت اور انتظامیہ ظلم اور زیادتی بند کرے اور مال کو فوری طور پر ڈی سیل کیا جائے بصورت دیگر جڑواں شہروں کی تاجر برادری بھرپور اور سخت احتجاج کرنے ، ہڑتال کی کال سمیت مال کو خود ڈی سیل کرنے پر مجبور ہو گی اور اس صورت حال کی تمام تر ذمہ داری حکومت اور اسلام آباد انتظامیہ پر عائد ہو گی۔
اجلاس میں بروز پیر دن 3 بجے مشترکہ پریس کانفرنس کے زریعہ حکومت اور اسلام آباد انتظامیہ کو مال کو ڈی سیل کرنے کی ڈیڈ لائن دی جاۓ گی اور اگے کے لائحہ عمل کا اعلان کیا جائے گا۔