سینٹورس مال کی انتظامیہ آتشزدگی کی ذمہ دار قرار

اسلام آباد کے سب سے بڑے شاپنگ مال سینٹورس میں آتشزدگی کے معاملے پر حتمی رپورٹ تیار کرلی گئی ہے جس میں مال انتظامیہ کو واقعہ کا ذمہ دار قرار دیا گیا ہے ۔
ذرائع کا کہنا ہے کہ آتشزدگی کے حوالے سے ایم سی ای کے محکمہ ایمرجنسی اینڈ ڈیزاسٹرمینجمنٹ کی حتمی رپورٹ تیار ہو کر آ گئی ہے تاہم ابھی تک یہ رپورٹ منظر عام پر نہیں لائی گئی ۔
ذرائع کے مطابق رپورٹ میں کہا گیا ہے کہ 9 اکتوبر کو لگنے والی آگ کا سبب تو معلوم نہیں ہو سکا تاہم یہ کہا جاسکتا ہے کہ جائے وقوعہ پر گیس اور بجلی کی مصنوعات کی شکل میں آگ کو بڑھانے کے لئے کافی موادموجود تھا ۔
ذرائع کے مطابق رپورٹ میں کہا گیا ہے کہ شاپنگ مال کی انتظامیہ کی جانب سے فائر سیفٹی کے معیار کی مکمل خلاف ورزی کی گئی جس کا تمام تر ریکارڈ بھی موجود ہے ۔
علاوہ ازیں اتنی بڑی بلڈنگ میں آگ سے بچاؤ کے لئے خود کار آلات کی تنصیب میں بھی کوتاہی کا مظاہرہ کیا گیا ۔
رپورٹ میں مزید بتایا گیا ہے کہ جس مقام سے آگ لگنا شروع ہوئی یعنی فوڈ کورٹ میں بھی فائر اینڈ سیفٹی کے قوانین کی خلاف ورزی کا مظاہرہ کیا گیا ۔ اس کے علاوہ شاپنگ مال کی انتظامیہ کے پاس تربیت یافتہ فائرفائٹنگ اسٹاف بھی موجود نہیں تھا ۔یہی وجہ ہے کہ نقصان زیادہ ہوا ۔
دوسری طرف اسلام آباد کی ضلعی انتظامیہ کا کہنا ہے کہ حتمی رپورٹ انکوائری کمیٹی کے ریکارڈ کا حصہ بنائی جائے گی ۔