سوات میں ریموٹ کنٹرول دھماکا، امن کمیٹی کے رکن سمیت پانچ افراد جاں بحق

سوات(بیورورپورٹ) سوات کے علاقے برہ بانڈئی میں گاڑی پربم دھماکے میں امن کمیٹی کے رہنما ادریس خان سمیت 5 افراد جاں بحق ہوگئے۔ ڈی پی او سوات زاہد نواز مروت کے مطابق دھماکہ امن کمیٹی کے رہنما ادریس خان کی گاڑی کو نشانہ بنایا گیا جس کے نتیجے میں گاڑی میں سوار امن کمیٹی کے رہنما ادریس خان ،دو پولیس اہلکارہیڈکانسٹیبل رامبیل اورکانسٹیبل توحیدسمیت ثناء اللہ اور ایک شخص جس کا نام معلوم نہ ہوسکا موقع پر ہی جاں بحق ہوگئے ۔ واقعے کے بعد پولیس کی بھاری نفری موقع پر پہنچ گئی اور علاقے کو گھیرے میں لے لیا ۔پولیس کے مطابق دھماکہ ریموٹ کنٹرول تھا جس میں 6سے 7 کلوگرام تک بارودی مواد استعمال کیا گیا تھا۔ دریں اثناء تحصیل مٹہ کے علاقے چپریال میں بین الاقوامی موبائل کمپنی کے ٹاور پر کام کرنے والے 7 اہلکاروں کو نامعلوم مسلح افراد نے اغواء کرلیا ہے ۔ اغوا ہونے والے افراد میں انجینئر یوسف شاہ،محمد خالد،ارسلان ،محمد اسبر ملک ،عبدالحکیم ڈرایئور اوروقت علی لیبرشامل ہیں ۔مغوی افراد کو نامعلوم مقام پر منتقل کردیا گیا۔پولیس کے مطابق مغوی افراد کی بازیابی کے لئے کوششیں جاری ہیں ۔