منچھر جھیل میں اس جگہ کٹ لگایا جہاں وزیراعلیٰ کا گھر ہے: شرجیل میمن

وزیر اطلاعات سندھ شرجیل میمن کا کہنا ہے کہ منچھر جھیل میں اس جگہ کٹ لگایا گیا ہے جہاں وزیراعلیٰ سندھ سید مراد علی شاہ کا گھر ہے۔
حیدر آباد میں میڈیا سے گفتگو کرتے ہوئے شرجیل میمن کا کہنا تھا آر ڈی 14 پر کٹ لگانے کا فیصلہ ٹاؤنز کو بچانے کے لیے کیا گیا، منچھر جھیل میں کٹ لگانے سے یوسی واہڑ، بوبک، اراضی، جعفرآباد اور چنہ متاثر ہوں گی۔
شرجیل میمن کا کہنا تھا کہ 5 یوسیز متاثر ہونے کی وجہ سے ایک لاکھ 25 ہزار لوگوں کو نقل مکانی کرنا پڑے گی اور لوگوں کو منتقل کرنے کے لیے حکومتی مشینری موجود ہے، متاثرین کو قریبی اضلاع میں منتقل کیا جائے گا۔
صوبائی وزیر نے بتایا کہ یو سی باجارا، جھانگارا پہلے ہی سیلاب سے متاثر ہیں، سیہون تعلقہ کا کافی حصہ سیلاب سے بری طرح متاثر ہو گا۔
انہوں نے بتایا کہ اس وقت سندھ کے 23 اضلاع شدید متاثر ہوئے ہیں اور ریلیف کیمپوں میں 6 لاکھ سے زائد لوگ موجود ہیں، وبائی امراض روکنے کے لیے ہر ریلیف کیمپ میں میڈیکل کیمپ لگانے کا فیصلہ کیا ہے اور تمام اسپتالوں میں ایمرجنسی بھی نافذ کر دی گئی ہے۔
شرجیل میمن نے بتایا کہ منچھر جھیل میں اس جگہ کٹ لگایا گیا ہے جہاں وزیراعلیٰ کا اپنا گھر ہے۔