اسلام آباد( کوہسار نیوز)شکرپڑیاں پر غیر ملکی خواتین کو ہراساں کرنے والے چار مرکزی ملزمان کواسلام آباد پولیس نے گرفتار کرلیا ہے۔گرفتار ملزمان میں سجاد احمد، عدیل کریم، ریاض خان اور ذاکراللہ شامل ہیں۔ملزمان ٹیکسلا کے رہائشی ہیں جن سے تفتیش جاری ہے۔ملزمان کے قبضے سے ویڈیوز بھی برآمد کرلی گئی ہیں۔
واقعہ کا مقدمہ سب انسپکٹر آصف علی کی مدعیت میں تھانہ آبپارہ میں درج ہے۔ ویڈیوز میں نظر آنے والے تمام ملزمان کی شناخت نادرا کے ذریعے کی جارہی ہے۔ملزمان نے 14 اگست کی شام شکرپڑیاں پر ہراساں کرتے ہوئے ٹک ٹاک بنائیں تھیں۔اسلام آباد پولیس کے ترجمان نے ایک بیان میں کہا ہے کہ اس وقوعہ میں ملوث تمام ملزمان کو گرفتار کرکے قانون کے کٹہرے میں لایا جائے گا۔
