شہید لیفٹیننٹ جنرل سرفراز علی کون تھے؟

بلوچستان میں گزشتہ روز ہیلی کاپٹر کے المناک  حادثے میں شہید ہونے والے پاک فوج کے لیفٹیننٹ جنرل اور کور کمانڈر کوئٹہ سرفراز علی ایک ذہین اور قابل افسر تھے۔

ان کا تعلق لاہور سے تھا، انہوں نے 1989 میں آزاد کشمیر رجمنٹ میں کمیشن لیا تھا۔

لیفٹیننٹ جنرل سرفراز نے پاکستان آرمی کےاہم عہدوں پر کام کیا، شہادت کے وقت وہ کورکمانڈر  12کور (جسے سدرن کور بھی کہا جاتا ہے) کے عہدے پر تعینات تھے اور بلوچستان میں سیلاب زدہ علاقوں میں ریلیف کےکاموں کا جائزہ لے رہے تھے۔ شہادت کے روز بھی وہ سارا دن نگرانی اور مانیٹرنگ میں مصروف رہے، واضح رہے کہ اس سے قبل انہوں نے ٹرپل ون بریگیڈ کی کمانڈ بھی کی اورکمانڈ اینڈ اسٹاف کالج کوئٹہ کے کمانڈنٹ بھی رہے۔ لیفٹیننٹ جنرل سرفراز ملٹری انٹیلی جنس کے ڈائریکٹر جنرل بھی رہے، انہوں نے مشکل وقت میں آئی جی ایف بلوچستان کی حیثیت سے بھی فرائض سرانجام دیے۔

دہشت گردی کے خلاف جنگ میں انہیں بہترین کارکردگی پر دو مرتبہ تمغہ بسالت سے نوازا گیا۔