غیرملکیوں اور غیرقانونی پناہ گزینوں کی رجسٹریشن کے احکامات جاری

اسلام آباد، غیرملکیوں اور غیرقانونی پناہ گزینوں کی فوری رجسٹریشن کے احکامات جاری وفاقی دارالحکومت اسلام آباد میں مقیم غیرملکیوں، ملازمین، کرایہ داروں اور غیرقانونی پناہ گزینوں کی رجسٹریشن کا آغاز ہوگیا۔اسلام آباد پولیس کے مطابق چیف کمشنر اور آئی جی اسلام آباد نے فوری رجسٹریشن کے احکامات جاری کیے ہیں اور  دو دن میں رجسٹریشن مکمل کرنے کا حکم دیا ہے۔ترجمان اسلام آباد پولیس کا کہنا ہےکہ شہری اپنے ملازمین، کرایہ داروں اور غیرقانونی پناہ گزینوں کی فوری رجسٹریشن کرائیں۔پولیس نے ہوٹل مالکان کو بھی ہدایت کی ہے کہ رہائش کیلئے آنے والے مہمانوں اور غیرملکیوں کا مکمل ریکارڈ رکھیں اور تھانے میں جمع کروائيں بصورت دیگر غیرقانونی رہائش دینے والے شہریوں اور ہوٹل مالکان کےخلاف قانونی کارروائی ہوگی۔ترجمان اسلام آباد پولیس کا کہنا تھاکہ ضلعی انتظامیہ اور اسلام آبادپولیس غیرقانونی پناہ گزینوں کیلئے متبادل جگہ دیکھ رہی ہے، یہ اقدام ان کی سکیورٹی کیلئے کیاگیا ہے تاکہ کوئی دہشت گرد یاشرپسند ان کے درمیان نہ ٹھہرسکے۔