اسلام آباد میں جھولا گرنے سے 2 بچوں سمیت 4 جاں بحق

واقعے کے حوالے سے موصولہ اطلاعات کے مطابق اسلام آباد کے نواحی علاقے پنڈوڑیاں میں چن پیر بادشاہ کے دربار کے قریب نصب جھولا جمعرات کو مغرب سے پہلے شدید آندھی کے نتیجے میں ٹوٹ کر گر گیا ۔مزار پر میلے کی وجہ سے لوگوں کی بہت بڑی تعداد موقع پر موجود تھی اور بچے بھی بڑی تعداد میں جھولا جھول رہے تھے کہ اس دوران تیز آندھی آئی اور جھولا ٹوٹ کر گر گیا جس پر سوار بچوں کے علاوہ نیچے کھڑے متعدد افراد بھی زد میں آگئے ۔ابتدائی طور پر ایک بچے اور ایک معمر شخص سمیت 2 افراد جاں بحق اور متعدد زخمی ہوگئے جنہیں پمز اسپتال پہنچایا گیا تاہم دوران علاج مزید 2 بچے لقمہ اجل بن گئے ۔عینی شاہدین کے مطابق جھولا گرنے کے بعد ہر طرف چیخ و پکار مچ گئی اور جائے وقوعہ پر قیامت صغریٰ کا منظر دیکھنے میں آیا ۔جاں بحق ہونے والے ایک شخص کی شناخت محمد شفیق کے نام سے ہوئی ہے جبکہ پنڈوریاں سے تعلق رکھنے والے دو کمسن بہن بھائی بھی جھولے کی زد میں آئے جن میں سے بچہ موقع پر جاں بحق ہوگیا جبکہ بچی کی حالت تشویشناک بتائی جاتی ہے ۔ زخمیوں میں واصف ۔ مظہر اور محمد علی کے علاوہ نو سالہ بچی حلیمہ اور دس سالہ مجاہد بھی شامل ہیں ۔واقعے کے بعد مقامی لوگ بڑی تعداد میں جمع ہوگئے اور زخمیوں کواپنی مدد آپ کے تحت اسپتال پہنچایا۔ مقامی پولیس اور ریسکیو اہلکار بھی بعد ازاں جائے وقوعہ پر پہنچ گئے۔ یہ امر قابل ذکر ہے کئی روز کی شدید گرمی کے بعد جمعرات کی شام اسلام آباد راولپنڈی اور ملحقہ علاقوں میں شدید آندھی اور طوفان کے بعد موسلا دھار بارش شروع ہوگئی تھی ۔