افسانہ۔۔۔ پردیسی، تحفے تے کَہلْ یَتْ۔۔ نازیہ درانی

اسلام آباد ایئرپورٹ اُپّر وہاء پیشی (دوپہر) مھاڑے واستے خاص سی۔ میں اپنی ہک قریبی رشتے دار (خاتون) کی کِہنْنَے تائیں آئی سِیاں، جیہڑے حج ناں فرض ادا کری تہ پاک جائی سی مُڑی آئے سے۔ اُنھاں نَیں مُونہے اُپّر اوہ نُور، وہاء ہُٹ یَتْ (تھکن) وِچ پلِٹّی (لپٹی) ہوئی لَوء تے اَکھّیں وِچ اوہ سکون سا جیہڑا صرف اللّہ نَیں کَہر (گھر) نی زیارت تھی بعد حاصل ہونا آ۔ اُنھاں کی دِکھنے نی سدھر (خواہش) وچ ،اپنے روحانی جذبات کِہنّی، میں اُنھاں نی چہات (جھلک) نی منتظر سِیاں تہ نالے اُس "انتظار گاہ” ناں وی حصہ بنی چُکی سِیاں۔ اِتھّیں کئی سو لوک اپنے اپنے حاجیاں یا پردیسیاں نے استقبال واستے اَکھّیں راہ اُپّر لائی کَھلتے (کھڑے) ہوئے سے۔

پورا ماحول روحانیت، خوشی تے اَپنیَت (اپنائیت) نال پَہریا وہاء سا۔ ہر چہرے اُپّر میل نی لَوء، ہر کوئی گَلے نال لگنے واستے بےقرار، تہ ہر آواز وچ وہاء بےتابی سی جیہڑی صرف اپنیاں کی گَلے لانَیں نال کَہٹ (کم) ہونی۔
"اَلحَمدُلِلّہ، مالک سلامت رکھیا!”
"مھاڑے آستے آبِ زَمزم لائے او؟ دُعا کِیتی سی آ مھاڑے واستے؟”
اِیہے جِیئّاں آوازاں مُڑی مُڑی سُننے وچ اَشنیاں سی آں۔ اِسّے کُہونغڑے (بھیڑ) وچ، مھاڑیاں نظراں ہک بَکھرا (منفرد) جیئا منظر قید کیتا۔

انتظار گاہ نی چُوکے (کونے) وچ ہک بَینچے اُپّر ہِک بندہ کَہلّا (تنہا) بیٹھا وہاء سا۔ اُس ناں حلیہ دَسناں سا جے اوہ کسے یورپی مُلخے وِچّا آیا۔ صاف ستھرا لباس، سادہ پر قیمتی سفری سامان ہک ٹرالی اُپّر ترتیب نال رکھیا وہاء۔ اوہ پُرسکون سا۔۔۔۔ نانہہ پُہونتھلیا وہاء تہ نہ ژے بےچین۔ اُس نے ہَتھے وچ پانی نی بوتل سی، نالے اوہ اپنے بیگے چا بسکٹ کَہڈّی تہ کھاہدے ای لگا وہاء سا۔ اوہ کَہلّا سا پر اُس نے چہرے اُپّر دُکھ نا تاثر بلکل نَہسا۔

مھاڑیاں نظراں مُڑی مُڑی اُس وَخ اُٹھّی گَشنیاں سِیئاں۔ میں خود کولا پُچھیا ،،، کَیہ اُس کی کِہنْنے واستے کوئی ناء آیا؟ کَیہ کسے کی اطلاع ژے نَیہی جے اوہ مُڑی تہ مُلخے کی آیا؟ یا شیت اُس اپنے اَشنے نَیں بارے وچ کسے کہ دَسیا ژے نانہہ وَیہہ!۔

اِسّے دوران مھاڑے نال کَھلتی ہوئی مھاڑی ننانوں گوشا بایا ۔۔۔ "پتہ ناء اوہ کون آ؟ شیت اوہ کسے کی کِہنْنے تائیں آیا، یا فِر خُود باھرلے مُلخا آیا۔ باھر والے لوک ہُن بدلی گئے۔ اوہ اَساں کی کُتھیں یاد رکھنے اے؟”

پَر مِیکی زقین سا جے اوہ بندہ خود مسافر سا، کِیئاں جے اُس نے سامانے اُپّر سٹکر لگا وہاء سا — اسلام آباد نی اُووئے فلائٹ، جِیہڑی یورپ سی آئی سی۔ میں آسے پاسے نظر پھیرائی۔ کئی لوک اپنے پیاریاں نے بیگ سمبھالنے وچ اِسرے مصروف سے، جِسرے اُنھاں وِچ جنت نِی آں کُنجیاں ہون۔ تحفے، چاکلیٹ، پرفیوم، جوتے۔۔۔ ہر کوئی اپنی توقعات نی فہرست ذہن وچ رکھی تے آیا سا۔ کُج بچے تے اَشنے والیاں کولا گلے مِلنے سی پَہلیاں ژے پُچھنے پیئے سے :
ماموں! مھاڑے آستے موبائل آندا یا؟
اسرے لگنا سا جسرے باھرا اشنے والے ناں وجود ثانوی ہوئی گا ویہہ تہ اس ناں آندا وہاء سامان لوکاں ناں اصل رشتہ دار ویہہ۔

دُووئے پاسے اوہ پردیسی بندہ، پوری طرحے ڈُوہنغی چُپ وچ ڈُبیا وہاء، اپنے بسکٹ کھانے ای لگا وہاء سا۔ ہِک واری اُس اپنا فون کَڈّھی، کسے نمبر اُپّر نظر جمائی تہ فِر اُس فون مُڑی بند کَری شوڑیا۔ شَیت اوہ سوچنا پَیئا سا۔۔۔
"فون کَری تے کَیہہ ہوسی؟ کوئی اَچھّے یا نانہہ اَچھّے، مِیکی اِس نال کَیہہ کِہنْناں دَینا آ”۔
میں اُس کَہڑی (لمحے) نَیں ڈُوہنغے تاثر وچ بندی وان ہوئی گئی سِیاں۔ ہِک پاسے کُہونغڑ، رولا رپا تے مطالبیاں تے توقعات وچ ڈُبّے ہوئے مسافر تے دُووئے پاسے ہک کَہل یَتّے (تنہائی) نَیں مزے کِہنْناں بندہ۔۔۔۔ جسی کسے نی گرم جوشی نی سدھر (خواہش) ژے نًہسی۔

ساھڑی اکثریت معاشرے نَیں طور اُپّر ظاہری ٹِیپ ٹاپ، تحفیاں، برانڈڈ سوٹ کیساں، تہ باھرلے مُلخاں نَیں نآں تہ ٹَیگ سی زیادے متاثر ہونی۔ اَساں ہُن باھرلے مُلخا اَشنے والے بندے کی اُس نے جذبے تہ احساس کی ساہمنے رکھی نئیں بلکن اُس نَیں ہَتھ وچ موجود بیگ کی دِکھی تہ تولنے آں۔ تے یقینا باھرلے مُلخا اشنے والیاں کی وی ہُن اس کوڑی (تلخ) سچائی نا ادراک ہوئی چُکیا۔

تھوڑے چِر (دیر) سی بعد اوہ اُٹھیا، اپنے بیگ ہُندناں (دھکیلتا) چُپ چُویتا باھر لِکڑی (نکلی) گا۔ کسے اس کی روکیا ناء، کوئی گلے لانے واستے ناء آیا، کوئی سیلفی نَیہی کِہنْدی گئی۔ پَر اُس نَیں باوجود اوہ ہِک سکون نے دائرے وچ پلِٹّیا (لپٹا) وہاء لگنا سا، جِسرے خود کفالت تہ خودداری اُس کی ہِک نَوِیں طاقت چائی دِتّی وَیہہ۔

میں اُتھّیں ژَے کَھلتی، اُس نویکلے منظر کی اَکھّیں وچ قید کرنی رہی آں۔ جِسلے مھاڑی رشتے دار خاتون باھر آئیاں، اُنھاں نے چہرے اُپّر نور، ہتھ وچ تسبیح تے ہَوٹھاں اُپّر مسکراہٹ سی۔ میں چَھٹ کَری تہ اُنھاں نَیں گلے لگی، دعائیں سمیٹیاں تہ اَسْ جذباتی ہوئی گئیاں سِیاں۔

یوء ایئرپورٹ نئیں بلکن ہِک مکمل سماجی منظرنامہ سا۔ اِتھّیں جذبات تہ احساسات نی قدر کَہٹ تہ تُحفیاں نی مَنگ زیادے سی۔ پر اِسے ماحول وچ اُس پردیسی نے نویکلے اندازِ فکر تے اُس نَیں اطمینان اِس راز اُپرا پَڑدہ چائیا جے خود غرض کُہونغڑے نَیں مقابلے وچ ہِک خود آگاہ بندے کی اپنا کَہل یَتْ بہتر سنگی، ہمدم تے سجن ہونا آ۔

اردو : نازیہ درانی،،🌟

پہاڑی ترجمہ : راشد عباسی