لاجواب غزل

حمد و نعت کی سعادت و برکت بہ زور بازو ممکن نہیں۔ یہ خالصتا عطا کا معاملہ ہے۔ جناب خالد علیم پر اس سلسلے میں رب اظہار کا خصوصی کرم رہا ہے۔

مرے کلام میں تاثیر اسی کے دم سے ہے
اسی سے فکر کی بنجر زمین ہے زرخیز

آپ نے غزل اور نظم کے علاوہ رباعیات بھی کہیں جو "تمثال” کے نام سے شائع ہوئیں۔ ان کی دیگر تصانیف میں محامد، فغان دل، شام، شفق تنہائی، کوئی آنکھ دل سے بھری رہی، بغداد آشوب، اردو شاعرات کی نعتیہ شاعری اور کلیات نما شامل ہیں۔

غزل

کاندھوں سے اتر کر باپ کے وہ، پہلو میں کھڑے ہو جاتے ہیں
جب بچے بولنے لگ جائیں، خاموش بڑے ہو جاتے ہیں

کھانے کی میز پہ برتن بھی جب سونا چاندی بن جائیں
آخر شوکیس کی آرائش مٹی کے گھڑے ہو جاتے ہیں

ان لوگوں کا کیا پوچھتے ہو، یہ لوگ ہیں نچلی بستی کے
مٹی کے ساتھ ہی یہ مٹی، مٹی میں پڑے ہو جاتے ہیں

جن شہروں کی آبادی میں احساس کی کوئی ریت نہ ہو
ان شہروں پر ویرانی کے میدان کھڑے ہو جاتے ہیں

اولاد جواں جب ہو جائے، سوچا ہے کبھی ان بوڑھوں پر
جو دن ان کے آرام کے ہیں، کیوں ان پہ کڑے ہو جاتے ہیں

خالد یہ باتیں ٹھیک نہیں، اتنا نہ الجھ تو لوگوں سے
صرف اپنے بڑوں کے مرنے سے کچھ لوگ بڑے ہو جاتے ہیں
۔۔۔۔۔
خالد علیم