ایران حملے میں زخمی امریکی فوجی دم توڑ گیا

امریکی سینٹرل کمانڈ کے مطابق یہ فوجی یکم مارچ کو سعودی عرب میں امریکی فوجی اڈے پر ایران کی جانب سے کیے گئے حملے میں زخمی ہوا تھا اور بعد ازاں زخموں کی تاب نہ لاتے ہوئے ہلاک ہو گیا۔ امریکی حکام نے کہا کہ ہلاک ہونے والے فوجی کی شناخت اس وقت تک ظاہر نہیں کی جائے گی جب تک اس کے اہل خانہ کو باقاعدہ اطلاع نہیں دی جاتی۔

قبل ازیں کویت میں ایرانی ڈرون حملے میں چھ امریکی فوجی ہلاک ہوئے تھے جن کی لاشیں واپس امریکہ منتقل کر دی گئی ہیں۔ ان فوجیوں کی یاد میں ڈوور ایئر فورس بیس پر تعزیتی تقریب منعقد کی گئی، جس میں امریکی صدر ڈونلڈ ٹرمپ، خاتون اول میلانیا ٹرمپ اور نائب صدر جے ڈی وینس سمیت اعلیٰ حکام نے شرکت کی۔

چھ امریکی فوجیوں کی ہلاکت کویت کے پورٹ شعیبہ پر ایرانی ڈرون حملے کے نتیجے میں ہوئی تھی، جس کے بعد ایران اور امریکہ کے درمیان کشیدگی میں اضافہ ہوا ہے اور دونوں ممالک کے درمیان تناؤ جاری ہے۔