شکور احسن ناں پوٹھوہاری شعری مجموعہ "اُکرے”

"اُکرے” شکور احسن ہوراں نا تازہ پوٹھوہاری شعری مجموعہ آ، جیہڑا طرحی مصرعیاں اپر لخیاں یاں انھاں نیاں غزلاں اپر مشتمل آ۔  یوء مجموعہ اس سال اگست وچ چھپیا۔ 112 صفحیاں نیں اس شعری مجموعے وچ "شاعری” تقریبا 60 (صفحہ 18 تا 83) صفحیاں اپر کھرلی ہوئی۔  کتاب نیں دوئے حصے وچ شکور احسن ہوراں نیں بارے لخیاں گیئاں اہل قلم نیاں آراء شامل یاں۔

شاعر حساس تہ ہونے ژے اے، پر جسلے کوئی تخلیق کار اپنے سماج نیں مسئلیاں، معروضی حالات، عالمی منظر نامے تہ اپنے لوکاں نی بے وسی نیں اسباب سی واقف ویہہ تے فیر اس ناں دل دکھ تہ تشویش نال پہرن ہوئی گشناں آ

تَکھّی کے تہ رُونڑاں اَسناں
خالی اَکھیاں، خالی چہولی

اَزلاں سی اَسّ ٹُرنے پَیئے آں
پَینڈے فِر وی مُکنے کوئی نئیں

اُس ناں جِینڑاں اوکھا ہویا
سچی گل تے جس وی بائی

جگتی سیاست نی گل کریے تہ دنیا اپر اج اسے ناں راج آ جس نی معیشت تغڑی ای۔ سامراج غریب ملخاں نیں وسائل اپر قبضے واستے نویاں نویاں چالاں چلنا۔  سرمایہ دارانہ معاشی نظام نی شاہی وچ انسان نیں روحانی وجود نی اہمیت ختم ہوئی گئی۔ انساناں نی اکثریت مادیت پرستی وچ لتھی ہوئی۔ شاعر اس کرب ناک صورت حال وچ کیہ سوچنا آ۔۔۔۔

کِیہڑے پاسے گَچّھاں احسن
آر تماشا، پار تماشا

سِدھی گَل تے کرنی کوئی نِینہ
گَلّاں کی لَمکانڑیں دُنیاں

ٹُوڑے ماریوں اَج تے احسن
اَکھیاں نُہوٹی خلقت نَسنی

اج ترقی یافتہ دنیا ٹہول مارنی پیئی جے اوہ دنیا نیں سب سی بڑے تہذیب یافتہ لوک اے۔  دنیاں نی معیشت اپر انھاں ناں قبضہ آ۔ عالمی میڈیا وی انھاں نیں تسلط وچ آ۔ اوہ جس طرحے کوئی منظر دنیاں کی دسنا چاہنے عالمی میڈیا اسے طرحے دسنا آ۔  ضروری ناء جے جس کی عالمی میڈیا برا تہ مندا کری دسنا آ اوہ اصل وچ وی اسے طرحے ویہہ۔۔ سامراج اپنے مفاد واستے لوئی کی انہیارا تہ انہیارے کی لوء بنائی تے دسناں آ

مہاڑی صورت دَسنے ویلے
شیشے کی سمجھایا گیسی

میکی نہورا اَیویں نانہہ کر
چالے کرنی جانڑِیں دُنیاں

مادیت پرستی غریب ملخاں نے لوکاں کی اپنی تہذیب تہ زبان نیں حوالے نال احساس کمتری نا شکار کری تے انھاں کی انھاں نی پچھان سی ژے محروم کری شوڑیا۔ اچیاں قدراں تہ روائتاں والے لوکاں اپنیاں نویاں نسلاں کی اپنی زبان تہ ثقافت کولا دور کری تے انھاں کی شاہ دولے نے چوہے بنائی شوڑیا۔ ہن ساک، رشتے، تعلق، جذبے ہبے کیں مادیت پرستی نیں ہڑ وچ رُہڑی گا۔۔۔

اُسّے تًہکّے دِتّے میکی
جِسکی موہنڈے چائیا بَہوّں سا

کَیہ دَسّاں، نانہہ دَسنے جوگا
سنگیاں میکی ماری سَٹیا

جِینڑیوں جی دفنائی دَینی
کیڈا ظلم کمانی دُنیا

زوال وچا نکلنے واستے ہکے رستہ آ، اپنی عزت نفس نی رکھوالی۔  علامہ اقبال ہوراں آخیا سا۔۔۔۔

غیرت ہے بڑی چیز جہانِ تگ و دَو میں
پہناتی ہے درویش کو تاجِ سرِ دارا

شکور احسن ہوراں کی اس راہ نی سختی نا ادراک تھیئا، اسے واستے اوہ آخنے

اپنا کَہھر وی پُہلّی گسناں
عشق نی سَپنی جسلے ڈَسنی

عشق محبت آلے احسن
اکھ نانہہ جوڑن راتیں ساری

پر اوہ یوء وی جاننے تہ سمجھنے جے منگتیاں نی کوئی عزت نفس نیئی ہونی، کوئی قدر نیئی ہونی تے کوئی عزت نیئی ہونی۔ کدے اساں جگتی سطح اپر ہک آزاد تے خود مختار ملخے نے طور اپر باعزت مقام حاصل کرنا آ تے فر اساں کی معاشی خود کفالت حاصل کرنی پیسی۔

گَل کسے نی اوہ نِینہ سُننے
جیہڑے اپنے دانے کھانے

راشد عباسی ۔۔۔۔ راولپنڈی