چیف جسٹس کے قتل کے لیے اکسانے والا ٹی ایل پی رہنما گرفتار

چیف جسٹس قاضی فائز عیسیٰ کو قتل کی دھمکی دینے اور اکسانے کی کوشش میں ملوث ٹی ایل پی کے نائب امیر کو اوکاڑہ سے گرفتار کر لیا گیا۔ذرائع کے مطابق گزشتہ روز اشتعال انگیز بیان دینے کے بعد تحریک لبیک پاکستان کے نائب امیر ظہیر الحسن شاہ روپوش ہو گئے تھے اور اوکاڑہ میں جا کر چھپ گئے تھے جہاں سے انہیں پولیس نے گرفتار کر لیا ہے۔

ظہیر الحسن شاہ کے خلاف لاہور کے تھانہ قلعہ گجر سنگھ میں ایس ایچ او حماد حسین کی مدعیت میں مقدمہ درج کیا گیا تھا جس میں انسداد دہشت گردی ایکٹ کے علاوہ مذہبی منافرت اور فساد پھیلانے عدلیہ پر دباؤ ڈالنے اعلی عدلیہ کو دھمکانے اور کار سرکار میں مداخلت سمیت دیگر دفعات شامل کی گئی ہیں۔ذرائع کے مطابق اس کے ساتھ ڈیڑھ ہزار ٹی ایل پی کارکنوں کے خلاف بھی ایف آئی ار کاٹی گئی ہے۔
مقدمے میں کہا گیا ہے کہ پریس کلب کے باہر احتجاج کر کے پیر ظہیر الحسن نے اعلی عدلیہ کے خلاف نفرت پھیلائی۔چیف جسٹس قاضی فائز عیسیٰ کا سر لانے والے کو ایک کروڑ روپے دینے کا اعلان کیا۔ذرائع کا کہنا ہے کہ اشتعال انگیزی میں ملوث ٹی ایل پی کے دیگر عناصر کو گرفتار کرنے کے لیے بھی پولیس تیاری کر رہی ہے۔