پوٹھوہاری نظماں ناں مجموعہ چریٹھ

عبدالرحمان واصف ہوراں ناں تعلق کہوٹہ نال آ۔۔ اردو نیں نال نال ماء بولی وچ وی سچجی شاعری کرنیں۔ ہن تک اردو نیں ترے (3) شعری مجموعے چھاپے چڑھی تے داد حاصل کری چکے۔۔

چریٹھ انھاں ناں ماء بولی وچ ٹہائی مصرعی نظماں ناں مجموعہ آ۔

واصف عام راہ کولا ہٹی تے ٹرنے والا لخاری آ۔ اوہ اپنے دوئے شعری مجموعے ” تحیر ” نے چھپنے نال بہوں مشہور ہویا۔ دوئے شاعراں آرا انھاں تائیں ایہہ بہوں سوخا کم سا کہ سٹھ ستر غزلاں لخی تے چھے مہینیاں نے اندر اندر ہک ہور شعری مجموعہ چھاپے چاڑھی شوڑن آ ۔ پر انھاں ہک اوخی راہ چنی تے نکیاں ترین بحراں وچ ہک مکمل شعری مجموعہ "مختصر” نے نائیں نال چھاپی تے ادب وچ اپنے نویکلے پن ناں پکا ثبوت پیش کیتا نیں۔ ہوناں تے ایہہ چائی نا سا کہ علمی ادبی لوک انھاں نے اس نویکلے کم نی قدر کرن آ، تے ادارے وی اپنا کردار ادا کرن آ ، پر مادیت نے آستانے اپر متھا رغڑنے والے لوکاں نی ترجیح معیاری نہیں مقبول ادب آ۔ حریانی نی گل ایہہ ای کہ پذیرائی نہ لبھنے نے باوجود واصف ہوراں ہمت نئی ہاری تے نانہہ یے اوہ ہتھے اپر ہتھ رکھی بئی رہے بلکہ انھاں نکیاں ترین نظماں نی ہک نویں صنف متعارف کروائی شوڑی جس وچ کل سوا دو مصرعے وے ۔ تے مھاڑے جئے ماء بولیاں نے خذمت گارے واستے ایہہ ہور وی خشی نی گل ای کہ ایہہ نظماں اس نی اپنی ماں بولی پوٹھوہاری وچ یاں ۔۔ تے خاص گل ایہہ ای کہ نظماں عروضی اعتبار نال لوہکیاں ضرور یاں پر انھاں وچ خیال بہوں بڑے تے آفاقی پیش کیتے گئے۔

بندیاں ناں ایہہ درد یرو کد تک
خشبو، پھل ، کونجاں ، مور لخو
کج ہور لخو

کنڈے پوڑنے عشقے نی راہ اوکھی
توں جے راہ ایہہ لپڑی ، دل گیر ہوسیں
لیر و لیر ہوسیں

ہک دوئے نال پھسائی سنگ تے کیہ لبھسی
آ، رلی ملی تے سارے مسلے حل کریے
ہُنڑ گل کریے

چپ رہسیں آخر کد تک توں
بنڑواسیں روز مخول یرا
کج بول یرا

میں عبدالرحمان واصف کی بہوں بہوں مارخاں پیش کرناں۔ انھاں نی ہمت، لگن تے مستقل مزاجی نی داد دینا۔۔ تے ایہہ وی آخناں چاہناں کہ ادب کدے وی اکثریت ناں مسئلہ نا رہیا، ایہہ اقلیت تے خواص ناں مسئلہ۔۔ اس واستے اپنا کم جاری رکھو۔۔ ناقدری سارے بڑے لوکاں ناں مسئلہ رہیا تے آئندہ وی رہسی۔ تساں نظم نے نال نال اپنی نثر اپر وی توجہ دیو تے فیصلہ کل نے مورخ اپر چھوڑی شوڑو۔۔ اللہ پاک تساں کی استقامت دین۔ آمین
۔۔۔۔۔۔۔۔۔۔۔۔۔۔۔۔۔۔۔
راشد عباسی ، راول پنڈی

پ