پہاڑی زبان اساں نی پچھان ای

پہاڑی زبان کی بچانے واستے ساہمنے اشناں کوہسار نے رہنے والے ہر بندے ناں فرض آ۔  کیاں جے پہاڑی زبان کوہسار نیں عباسیاں، ستیاں، کیھٹوالاں، دھنیالاں تے دووئیاں ساریاں قوماں نی پچھان ای۔

اساں نے پیو دادے بہوں پڑھے لخے نیسے۔ فر وی انھاں نسلاں سی سینہ بہ سینہ ٹرنے ساہڑی ماء بولی نے اثاثے (لوک کہانیاں، لوک گیت، آخان، بیاہ نے گیت (گالیں)، چن، ٹہولے تے ہور بہوں کج) کی اساں تک امانت نے طور اپر سانوی سمبھالی تے پوہچائیا۔ انھاں کی توقع ایسی جے اساں اس امانت کی اشنے والی نسلاں تک پوہچاساں۔

اج کل اساں سوشل میڈیا نے ذریعے دکھنے آں جے ہر قوم اپنی زبان نے تحفظ تے قانونی حق استے جہدی کرنی۔ اپنی اولادی نال بولنی۔ پر اساں شرمانے آں۔ خدا ناں واسطہ یا یوء آخری موقع یاء۔ کدے ہک محکمہ اج ساہڑی ماء بولی ناں انکاری آ تے کل کودر اوء اساں نے شجرے کی وی مننے سی انکار کری سکنے۔ جس طرحے پہلیاں وی تنقیدا ہونی رہی۔

دکھو ! اساں نے دادے پڑدادے، جناں نیاں محنتاں اپر اساں پلنے یاں، اج انھاں نیاں روحاں اساں کولا سوال پچھنیاں جے اساں نی زبان آخری ساہ کیاں کہننی پیئی؟؟؟ نالے کدے بد قسمتی نال اس نے یاء حالت ہوئی یے گئی تے اس نی بقا تے بادھے واستے اساں کیہہ کرنے پیئے آں ؟؟؟ انھاں نیاں روحاں اساں کی یاد کرانیاں۔۔۔

"اساں تے تساں تائیں زمیناں، جائیداداں تے پیسا چھوڑی گئے سیاں۔ تساں نی تعلیم تے تربیت کیتی سی۔ تساں کی ہنر مند بنائی تے تہذیب سکھائی سی۔ اج جسلے اساں نی زبان نے دفاع نا ویلا آیا تے تساں گھٹیاں وچ منہ دیئی کہندا۔ آپس وچ یاء جہڑی تساں گلابی اردو بولنے یوء، اس کولا بچو کیاں جے دنیا نی کوئی وی قوم اپنے لوکاں نال کسے دووئی زبان وچ گل نیئی کرنی۔ نالے اردو کی کوئی خطرہ وی ناء۔ یاء اساں نی قومی زبان ای۔ ریاست کی اس نے واستے ہبے کیں کرنا چائیناں۔ رہی بے چاری پہاڑی زبان، تے یاء جنھاں نی ماء بولی ای اوہے احساس کمتری ناں شکار ہوئی تے اس نے دشمن تے قاتل ہوئی گئے”

تساں ساریاں نی خذمت وچ ہک درخاس ای جے تھوڑی خوداعتمادی پیدا کرو۔ کدے پٹھان اپنے لوکاں نال ہر جائی پشتو بولنے، سندھی سندھی بولنیاں فخر محسوس کرنے۔ پوٹھوہاری اپنی ماء بولی واستے اسمبلیاں وچ اچے اچے آلے دینے۔ گوجری والے عدالتاں وچ کیس لڑنے۔ تے اساں کی اپنی ماء بولی نے معاملے وچ احساس کمتری کیاں آ؟
۔۔۔۔۔۔۔۔۔۔
احمد سہران عباسی