ویکھ ہاں ایدھر میرے سائیں
حکیم احمد نعیم ارشد
ویکھ ہاں ایدھر میریا سائیاں
بادشاہواں نے گھڑیاں پائیاں
سونے دی اک بیس بنا کے
آل دوالے ہیرے لاکے
اندر تیرا گھار بنا کے
وِچ ویلے دیاں سوئیاں لائیاں
ویکھ ہاں ایدھر میریا سائیاں
لکھاں دھیاں نیں ترہائیاں
لَکھاں پُتر بُھکھ نال موئے
ایدھر اودھر کَھجل ہوئے
اپنے آپ تے آپے روئے
سائیاں کیہ اے ہو سکدا اے؟
بادشاہت دا رولا مُکے
نہ کوئی موہڈیاں اُتوں تُھکے
نہ کوئی ماڑا ترلے پائے
ہر تھاں دور جمہوری آئے
تیرا ہر جی رَج کے کھائے
نالے تیرے نعرے لائے
نالے ہَس ہَس دوے ودھائیاں
ویکھ ہاں ایدھر میریا سائیاں………..!
حکیم احمد نعیم ارشد