مری ہلز بس سروس۔ خطہ کوہسار کی روایات کا درخشاں باب
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مری ہلز بس سروس۔ خطہ کوہسار کی روایات کا درخشاں باب ہے۔یہ ساٹھ، ستر اور اسی کی دہائی میں ایبٹ آباد کے گاؤں بیروٹ سے راولپنڈی چلنے والی بس تھی، جس کے مالک اور ڈرائیور اسی علاقے (ٹنگان) کی ایک باوقار ،رعب دار مگر چھوٹے بڑوں کی ہر دلعزیز اور مقبول شخصیت رزاق عباسی تھے جنہیں لوگ رزاق لالی کہا کرتے تھے۔لالی بڑے بھائی کیلئے محبت اور تکریم سے استعمال کیا جاے والا لفظ ہے جو اب جدید معاشرے میں دیگر حسین روایات کے ساتھ متروک ہو چکا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رزاق لالی اپنی مری ہلز میں سفر کرنے والے مسافروں کو خاندان کی طرح عزیز رکھتے تھے،کون کس کام سے راولپنڈی یا اس سے آگے جا رہا ہے، کس کو ملازمت درکار ہے اور کون بیٹے کا کالج میں داخلہ کرانے جا رہاہے۔ یہ سب باتیں اور تمام دیگر چھوٹے بڑے مسائل رزاق لالی کے ساتھ اسی طرح ڈسکس ہوتے جیسے گھر کے کسی بڑے کو آگاہی دی جاتی اور رہنمائی حاصل کی جاتی ہے۔رزاق لالی کا مری ہلز کی سواریوں کے ساتھ تعلق کیا تھا اس کی ایک جھلک آپ کو ذیر نظر تحریر میں ملے گی، جس کے خالق اوسیا سے تعلق رکھنے والے حبیب عزیز ہیں جو کبھی بچپن اور لڑکپن میں مری ہلز کے مسافر رہے ہیں۔ یہ تحریر انن کے شکریے کے ساتھ شائع کی جا رہی ہے۔
حبیب عزیز ۔۔ صاحب تحریر
اوسیاہ بازار کی مرکزی جامع مسجد میں عصر کی نماز ہوچکی تھی۔
قدیم زمانے کی بنی ہوئی جامع مسجد کی ٹین کی ڈھلوان چھت تھی جسے مقامی زبان میں ” بارک ” کہا جاتا تھا۔مسجد کے سامنے کھلا صحن تھا۔اوسیاہ بازار گنی چنی چند دکانوں یا کچی ہٹیوں پر مشتمل تھا۔مین روڈ بہت خاموش تھی ۔گھنٹوں بعد اکا دکا گاڑی گزرتی تھی۔
پورے بازاز میں خاموشی اور سکون تھا۔مسجد کے ساتھ بنی ہوئی ڈھلوان چھت کی مارکیٹ کی آخری دکان سے مٹی کے تیل سے جلنے والے ہوا بھرے چولہے کی سراسرئٹ کے علاوہ آخری سرے پر واقع چشمے” ناڑے” کی آواز کے سوا مکمل خاموشی تھی۔
گاؤں کی شام شروع ہوچکی تھی۔نمازی نماز کے بعد گھروں کو جاچکے تھے۔ایسے میں پنڈی سے آنے والی ڈاج بس آکر رکی۔یہ مشہور مری ہل بس کا معمول کا سٹاپ تھا۔ڈرائیونگ سیٹ پر بیٹھے بارعب ڈرائیور نے آواز لگائی "” ظہراب گڈی وچ پانی پر”
طویل عرصے تک مری ہلز پر کنڈکٹری (کلینڈری) کے فرائض انجام دینے والے کہو کے ظہراب پہاپا
ظہراب پہاپا اس بس کا کنڈیکٹر تھا۔اس نے پھرتی سے ناڑے سے پانی بھرا اور بس کی چھت پر چڑھ کر ریڈی ایٹر میں پانی ڈالنا شروع کردیا۔
ڈاج ماڈل کی یہ بس یا لاری قیام پاکستان سے قبل کا ماڈل تھا جس کے ریڈی ایٹر کے پائپ کا منہ چھت پر کھلا کرتا تھا۔
پانی بھرنے کے بعد ڈرائیور نے بس کا انجن بند کیا اور نیچے اتر آیا۔بس کی دیکر سواریوں نے بھی اتر کر پہلے ناڑے کا رخ کیا پھر بازار کی آخری دکان سے گرماگرما سموسے خرید کھائے۔ 10 منٹ کا معمول کا سٹاپ ختم ہوا تو ظہراب نے لوہے کا لمبا ہینڈل سنبھالا اور بس کے انجن میں مخصوص جگہ پر لگا کر زور سے گھمانا شروع کیا۔
یہ ڈاج بس کا سٹارٹ سسٹم تھا جسے بازو کے زور سے گھما کر سٹارٹ کیا جاتا تھا۔بس سٹارٹ ہوئی اور اپنے آخری سٹاپ بیروٹ کی طرف روانہ ہوگئی۔
مری ہلز بس کا پہلا اور آخری سٹاپ بیروٹ، جو رزاق لالی کا آبائی گاؤن بھی تھا
یہ بس خطہ کوہسار کی ایک ایسی تاریخ تھی جسے ہمیشہ یاد رکھا جائے گا۔اس سے منسلک دو افراد نے اس زمانے میں پنڈی مری بیروٹ روٹ پر رہنے والے ہر فرد کی خدمت کی۔
اس بس کے ڈرائیور کا نام محمد رزاق تھا جنہیں لالی رزاق کہا تھا جاتا تھا۔بس کنڈیکٹر کا نام محمد ظہراب تھا جنہیں چھوٹے بڑے سب ظہراب پہاپا کہا کرتے تھے۔
قیام پاکستان کے وقت اور اس کے برسوں بعد جھیکاگلی سے شروع ہونے خاقان عباسی روڈ نہیں بنی تھا۔گھڑیال کیمپ سے آگے کشمیری باآر تک کچی روڈ ہوا کرتی تھی۔60 کی دہائی می دیول حد تک روڈ تعمیر ہوئی بعد میں اس روڈ کو ملاچھ تک بنایا گیا جہاں جاکر یہ انگریز دور کی پنڈی کشمیر ہائی وے میں ضم ہوجاتی ہے۔
تقریبا 30 سال تک ہر روز بالاناغہ اپنے مخصوص وقت میں مری ہل بس بیروٹ سے چلتی اور پنڈی تک جاتی۔اس بس کی مخصوص سواریاں ہوا کرتی تھیں جو کسی اور گاڑی میں سفر نہیں کرتیں تھیں۔ہر طرح کے لوگ اس بس میں سفر کرتے تھے۔جن کے پاس کرایہ نہیں ہوتا تھا انہیں بھی اس بس میں مفت سفر کی سہولت میسر تھی۔راستے میں کمپنی باغ جاکر چائے تک پلائی جاتی تھی۔اس بس کے ڈرائیور بہت وضع دار انسان تھے جو ہر کسی کی عزت کرتے تھے۔یہ بس زیادہ رفتار سے کبھی نہیں چلتی تھی۔خراماں خراماں 4 گھنٹوں میں پنڈی پہنچا کرتی تھی۔پرانے بزرگ اس بس میں سفر کو ترجیح دیا کرتے تھے۔
جب آتش جواں تھا،آج کل کے زیادہ تر لوگوں نے رزاق لالی کو دور جوانی میں نہیں دیکھا ہو گا
وقت بدلا زمانے بدلے ۔سڑکوں پر نئی گاڑیوں کی ریل پیل شروع ہوئی۔مری ہل نے بھی اپنا رنگ بدلا۔پہلے بیڈ فوڑڈ ماڈل لیا گیا اور پھر نئی نسان بس ۔لیکن رفتار وہی۔وضع داری وہی رہی۔
راستے میں آنے والے سٹاپ بھی بدل گئے۔اوسیاہ کی جامع مسجد دو منزلہ ہوگی۔سموسے پکوڑے کی دکان ختم ہوگئی۔پھر زمانے کی رفتار کا ساتھ دینا مشکل سے مشکل ہوتا گیا۔نئے ماڈل کی فورڈ ویگن اور ٹویوٹا ہائی ایس نے بسوں کا زمانہ ختم کردیا۔
اپنے وقت میں خطہ کوہسار کی خدمت کرنے والے زراق لالی بھی چل بسے۔ان کا ہنستا بستا گھر اکلوتے بیٹے کی وفات کے بعد اداسی اور ویرانی کے سائے تلے آگیا۔نوجوان پوتی بجلی کے کرنٹ کا شکار ہوئی۔اپنے وقت میں جو گھرانہ پورے گاوں میں سب سے زیادہ بارونق ہوا کرتا تھا۔اب اداسیوں ویرانیوں اور معاشی مشکلات کا شکار ہوچکا ہے۔
برسوں بعد خطہ کوہسار کی خدمت والے کرنے زراق لالی کی داستان حیات کا کھوج لگانے کی کوشش کی تو انکی اداس قبر اور دوچار تصاویر کے سواہ کچھ نہ مل پایا۔
مری ہلز کے مالک رزاق لالی اب بیروٹ کے محلہ ٹنگان میں آسودہ خاق ہیں۔ اللہ مغفرت فرمائے
میں نے اپنے بچپن میں انکی بیڈ فورڈ کو دیکھا تھا۔اس میں سفر بھی کیا تھا۔ظہراب پہاپا کو دیکھا تھا۔آج پتہ پوچھتے پوچھتے انکی قبر تک جاپہنچا۔وضع دار اور عزت دار رزاق لالی کے گھر والوں نے پہلے چائے پانی سے تواضع کی پھر انکی قبر تک راہمنائی کی ۔خطہ کوہسار کے خدمتگار کی اخروی زندگی کے لئیے فاتحہ خوانی کا موقع ملا
اس کے بعد اچانک بازار میں ظہراب پہاپا سے ملاقات ہوگئی۔
دل بہت اداس ہے۔کاش ہم میں سے کوئی ماضی کے ان کرداروں اور انکے اہل خانہ کی خدمت کے لئیے کچھ کرپائے۔یہ اس خدمت کا بدل تو ہرکز نہیں ہوسکتا جو انہوں نے ہمارے علاقے کی اپنے وقت میں کی مگر کچھ نہ کچھ تو ہوسکتا ہے۔جس سے ان کے اہل خانہ کو کچھ سکون مل جائے۔۔۔کاش
مے را بیروٹ۔
سرکل بکوٹ۔ابیٹ آباد۔
مورخہ 16 ستمبر 2023
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قارئین کرام بیروٹ سے تعلق رکھنے والے خطہ کوہسار کے اس عظیم اور ہر دلعزیز فرزند رزاق لالی کا اکلوتا بیٹا خورشید عرف اللہ دتا تھا،جس کا چند برس قبل انتقال ہوا ، تب اس علاقے کے معروف صحافی اور رزاق لالی کے پڑوسی عبیداللہ علوی نے خورشید کے انتقال پر ایک تحریر لکھی تھی جس میں اس خاندان بالخصوص رزاق لالی کو خراج تحسین پیش کیا گیا تھا۔دو برس بعد خود عبیداللہ علوی بھی دنیائے فانی سے کوچ کر گئے۔ فیس بک پر موجود ان کی یہ تحریر کوہسار نیوز کے قارئین کیلئے پیش کی جا رہی ہے۔
عبیداللہ علوی مرحوم
ویلے نیں اکلوتے بندے نی ۔۔
تےمہاڑے گوانڈی ۔۔۔۔ خورشید عباسی عرف اللہ دتے ۔۔۔۔ نیں
دنیا را گچھے نی ۔۔۔۔ نویکلی گل
*****************
اِنَّا لِلّٰہِ وَاِنَّآ اِلَیْہِ رَاجِعُوْنَ
*****************
وفات کی فوری وجہ دل کا دورہ تھا
——————–
خورشید عباسی کے گھر کے عقب میں ایک قبرستان ہے ۔۔۔۔ جہاں اس کی بھی آخری آرام گاہ تیار کی گئی ہے ۔۔۔ وہاں پر اس کے پہاپا اور کوہسار کے معروف پہلے ڈرائیور اور پھر ٹرانسپورٹر ،،،، محمد رزاق خان عباسی مرحوم،،،،، اس کے دادا مہدی خان مرحوم، راقم کے دادا مولانا میاں میر جی علوی مرحوم اور یو سی بیروٹ سے سرکل بکوٹ سے دارالعلوم دیوبند، بھارت کے اولین فارغ التحصیل عالم دین ۔۔۔ میاں محمد دفتر علویؒ (المتوفی8 نومبر1910ء) بھی یہاں ہی آسودہ خاک ہیں ۔۔۔۔ کیونکہ میرے دادا اور مولانا دفتر علویؒ کو مہدی خان مرحوم نےاپنا بھائی قرار دیا تھا اور زبان دی تھی کہ ان تینوں میں سے جس نے بھی سفر آخرت میں تاول کی ۔۔۔۔ وہ مہدی خان کے اسی شہر خموشاں میں اپنا ابدی گھر بناوے گا ۔۔۔۔ مولانا دفتر علویؒ اس قبرستان کے پہلے ابدی مکین بنے، دوسری خود مہدی خان مرحوم اور تیسرے راقم کے دادا مولانا میاں محمد میر جی علوی ۔۔۔۔ اگرچہ تینوں کے ابدی گھر تو ساتھ ساتھ نہیں مگر ایک ہی جگہ ضرور ہیں ۔
خورشید عبسی عرف اللہ دتا
خورشید عباسی مرحوم ۔۔۔۔ یو سی بیروٹ کی وی سی کہو شرقی کے محلہ ۔۔۔ ٹنگان۔۔۔۔ سے تعلق رکھتا تھا، خلیق عباسی، مفتی عتیق عباسی، زرین عباسی اور گلفام عباسی کے قبیلے ،،،،، فقیرال ڈھونڈ عباسی،،،،، کا ہی ایک فرد اور ان کا دادے پوترا تھا ۔۔۔۔ آپ سب بزرگوں اور چالیس سال سے اوپر کے کوہسار کے لوگوں کو یاد ہو گا کہ اپر دیول کوہالہ روڈ پر اس کی تعمیر کے وقت 1964ء سے ہی ۔۔۔۔ مری ہلز ٹرانسپورٹ سروس ۔۔۔۔ کے نام سے برسوں ایک اکلوتی بس چلتی رھی، بس کا رنگ سبز ہوتا تھا اور اس روڈ پر پہلی اور اکلوتی بس سروس چلانے والے، بلکہ تاریخ ٹرانسپورٹ لکھنے والے اسی اللہ دتہ مرحوم کے والد مرحوم ۔۔۔ محمد رزاق خان عباسی ۔۔۔ ہی تھے اور آج کی تمام سیاسی، ادبی، علمی اور دیگر ہستیاں اسی بس سروس کی سواریاں تھیں ۔۔۔۔۔
رزاق لالی بلامعاوضہ چٹھی رساں بھی تھے
رزاق لالی کے بارے میں مشہور تھا کہ وہ بیروٹ ، دیول ،اوسیا وغیرہ کی سواریوں کیلئے کسی بھی موڑ پر گاڑی کھڑی کر کے اس وقت تک ہارن بجاتے تھے جب تک پنڈی جانے کیلئے وہ سواری نہ آ جاتی ۔۔۔۔ سواریاں شام کے وقت ان کے پاس خود جا کر بھی اپنی بکنگ کرواتی تھیں ۔۔۔وہ Unpaid چٹھی رساں بھی تھے، ان کی ایک صاحبزادی کا کہنا تھا کہ جب ہم پہاپے کے کپڑے دھوتی تھیں تو ان کی جیبوں سے ایک کلو سے زائد رقعے اور چٹھیاں بھی برآمد ہوتی تھیں ۔۔۔ پہلے وہ اکھوڑاں، بیروٹ سے راولپنڈی اور واپسی پر سنی بنک سے مری کے ایجنسی گراؤنڈ بھی جاتے اور سواریاں بٹھا کر واپس منزل کی جانب چل پڑتے ۔۔۔ سواریاں ان کا انتظار کرتیں ۔۔۔
علاقے کی ڈرائیور برادری کے ،،،،نویکلے اُستا جی
اہل بیروٹ اور دیول اوسیا سمیت گردونواح کے مکین اپنی بچیاں ان کے ساتھ کسی پریشانی کے بغیر مری اور راولپنڈی بھیجتے کیونکہ ۔۔۔ وہ رزاق خان عباسی پر ایمان کی حد تک بھروسہ کرتے تھے ۔۔۔ رزاق خان مرحوم ایک پروفیشنل ڈرائیور ہی نہیں بلکہ ۔۔۔۔ علاقے کی ڈرائیور برادری کے ،،،،نویکلے اُستا جی،،،، بھی تھے اور جب وہ گاڑی چلانے کے قابل نہیں رہے تو ۔۔۔۔ میرا، کہو شرقی کی نزاکت عباسی کی دکان کو یو سی بیروٹ کا پہلا، اکلوتا اور اپنا نویکلا پٹرول پمپ بھی بنا کر اس میں بیٹھنے تلگے ۔۔۔۔ اور ان کیلئے اپنے بھروسے کے حامل ڈرائیور حضرات کی کمی نہیں تھی ۔۔۔۔ ان کے اکائونٹنٹ پیتلاں نی ہل، ہوترول سے لینڈ سلائڈنگ کے باعث بیروٹ میں ہائیر سیکنڈری سکول کے شرق میں آباد ہونے والے ٹیچر تاج عباسی بن مسُو خان تھے ۔
******************
عہد جدید کی بد تمیز ترین ٹرانسپورٹ ۔۔۔۔ جسے ٹرانسپورٹ برادری ٹویوٹا ہائی ایس بھی کہتی ہے اور جس کے کنڈیکٹر حضرات سے راولپنڈی سے بیروٹ جاتے یا بیروٹ سے پنڈی آتے ہوئے کرائے کی صورت میں فیس دے کر ،،،، ورلڈ کلاس،،،، معیار کی بے عزتی نہایت اطمینان سے کرائی جا سکتی ہے ۔۔۔۔ ان ویگنوں کی شروعات نے بھی ۔۔۔۔ بیروٹ کی اکلوتی، نویکلی اور تاریخی مری ہلز ٹرانسپورٹ بس سروس ۔۔۔ کو متاثرکیا، اس وقت رزاق خان مرحوم سفرآخرت پر روانہ ہو چکے تھے اور ان کا 6 بہنوں کا اکلوتا اور نہایت لاڈلا پتر ۔۔۔۔ خورشید عباسی عرف اللہ دتہ ۔۔۔۔ خود اپنی Nissan بس کی ڈرائیونگ نشست پر آ گیا تھا ۔۔۔۔ ایک دو سال کے بعد کوہسار کی سواریوں میں سفر کیلئے ۔۔۔ بسیں متروک اور یہی بدتمیز ہائی ایس ویگنوں نے مقبولیت حاصل کر لی اور پھر ،،،، مری ہلز ٹرانسپورٹ بس سروس،،،،، کے علاوہ دن میں پنڈی کے دو پھیرے لگانے والی 3725 , برادرم نثار عباسی مرحوم کی بس پس ،،،، جسے پھر دلہن بنا دیا گیا،،،، سمیت تھلہ، باسیاں کے حسین عباسی مرحوم کی پہاڑوں کی شہزادی اور دیگر ایک درجن بسیں پس منظر میں جانے لگیں ۔۔۔۔ رزاق خان مرحوم کی محنت کی یہ نشانی میرا میں دو سال کھڑی رہی اورپھر اسے راولپنڈی میں ہی کسی نئے مالک کے حوالے کر دیا گیا
*******************
اللہ دتہ بڑا ہنس مُکھ نوجوان تھا ۔۔۔۔ یاروں کا یار، نہایت ہمدرد اور دُکھ سُکھ بانٹنے والا اپنے والد کی طرح ایک زندہ دل انسان ۔۔۔۔ خورشید کا ننھیال وی سی سہری باسیاں میں تھا اور ۔۔۔۔ باسیاں کی مرکزی مسجد کو بر لب سڑک نہایت قیمتی اراضی عطیہ کرنے والے ۔۔۔۔ کبیر عباسی مرحوم ۔۔۔۔۔ اس کے سگے ماموں تھے ۔۔۔ راقم اور خورشید کا خُسرال باسیاں میں ایک دوسرے کے پڑوسی جبکہ کہو شرقی میں راقم اور اللہ دتہ گوانڈی تھے ۔۔۔۔ اس ساری کہانی کا المیہ موڑ اس وقت شروع ہوتا ہے جب ہم ۔۔۔۔ اس کی پیرانہ سال ددے یا امی کو دیکھتے ہیں، انہوں نے بھی اپنے محنتی شوہر رزاق خان مرحوم اور اپنے ٹبر کی خدمت میں کوئی کسر نہیں چھوڑی ۔۔۔ صبح چار بجے ان کا آج بھی اس بڑھاپے میں اٹھنا معمول ہے، وہ اپنی شادی کے وقت سے اسی معمول کی عادی ہیں ۔۔۔۔ صبح اٹھتیں، اپنے خدائے مجاز کو ناشتہ دیتیں اور پھر وہ جب ،،،، مے رے ،،،، کی جانب نور پیر نیں ویلے جب پینڈا مارتے تو انہیں اللہ رب العزت کی امان میں دے کر بستر پر آ جاتیں ۔۔۔۔
گورنمنٹ ہائی سکول بیروٹ جس کے قریب مے را کے مقام پر مری ہلز کا آخری سٹاپ تھا
اللہ دتہ کا خُسرال بھی باسیاں ہی تھا اور اس کے گھر کی ملکہ بھی اس کی ماموں زاد یا فرسٹ کزن ہیں ۔۔۔۔ اللہ سبحانہ و تعالیٰ نے اس جوڑے کو چار بچیوں سے نوازا ۔۔۔ میرے گوانڈی ہونے کے با وصف رزاق خان اور اللہ دتہ کے ٹبر کی ان کے گھر سے کبھی اونچی آواز نہیں سنی ۔۔۔۔ یہ ساری فیملی راقم الحروف کی والدہ مرحومہ کی قرآنی شاگرد تھی ۔۔۔۔ رب کائنات، نوجوان خورشیدعباسی المعروف اللہ دتہ کو فردوس کی ساری راحتوں سے فیضیاب کرے، اسے خاتم الانبیاءﷺ کی شفاعت نصیب ہو ۔۔۔۔ اور ۔۔۔۔ اس کی پیرانہ سال اور ہمارے محلے کی سب سے بزرگ والدہ محترمہ کے سرتاج، موہشم بیٹیوں کے ابو اور ہمشیرگان کا اپنے اس اکلوتے اور نویکلے بھائی کی اس جوان موت پر صبر جمیل عطا فرماوے ۔۔۔۔ موت وہ زندہ حقیقت ہے جس کا ہم سب کو اپنی اپنی باری پر سامنا کرنا ہے ۔۔۔۔ بقول شاعر کوہسار مولانا میاں محمد یعقوب علوی بیروٹویؒ ؎
ہر بہار گل کو ہے ۔۔۔۔۔۔۔۔۔۔۔۔ دور خزاں آنے کا غم
غنچہ کو گُل بننے کا اور گُل کو مرجھانے کا غم
پائے عمر نوح انساں یا ۔۔۔۔۔۔۔۔۔۔ ہو مرگ نو جواں
دور فانی میں ہے ہر انساں کو ۔۔۔۔ مرجانے کا غم
**********************