عمران خان اور بشرٰی بی بی کی ضمانتیں منظور

تحریک انصاف کے سربراہ عمران خان کو عدالت نے 17مقدمات میں ضمانت دے دی ہے۔علاوہ ازیں عمران اور ان کی اہلیہ بشریٰ بی بی کو القادرٹرسٹ کیس میں 4جولائی تک عبوری ضمانت بھی دے دی گئی ہے۔توشہ خانہ جعل سازی کیس میں بشریٰ بی بی کو4جولائی تک عبوری ضمانت ملی ہے۔

پیر کے روز نو مئی سمیت دیگر چھ مقدمات میں عمران خان کی ضمانت کی درخواستوں پر سماعت اسلام آباد کے ایڈیشنل سیشن جج طاہر عباس سپرا نے کی۔عدالت نے عبوری ضمانت میں چار جولائی تک توسیع کر دی۔ جج سکندر خان نے مارگلہ تھانہ میں درج مقدمے میں چیئرمین پی ٹی آئی کو شامل تفتیش ہونے کے لیے چار جولائی تک مہلت دے دی۔عدالت نے کہا ہے کہ چار جولائی تک عمران خان شامل تفتیش ہوں بصورت دیگر آپ ذمہ دار ہوں گے۔

اس کے علاوہ عمران خان کے خلاف اسلام آباد کے تھانہ مارگلہ میں درج مقدمہ کی سماعت ایڈیشنل اینڈ سیشن جج سکندر خان نے کی۔عمران خان کے وکیل بیرسٹر سلمان صفدر نے عدالت کو بتایا کہ جوڈیشل کمپلیکس میں 17 مقدمات درج ہیں، جن میں عمران خان شامل تفتیش ہوئے ہر سوال کا جواب دیتے رہے ہیں۔  ہم تمام سوالات کے جواب دے چکے ہیں۔پولیس پروسیکیوٹر نے عدالت میں موقف اپنایا کہ چیئرمین پی ٹی آئی تاحال تفتیشی عمل میں شامل نہیں ہوئے۔ ڈی آئی جی پولیس کا آفس نزدیک ہے شامل تفتیش ہو جائیں۔ ویڈیو مانیٹرنگ کے باعث ڈی آئی جی آفس سیکیورٹی کے لحاظ سے محفوظ ہے۔ ہم نے ملزم کو ویڈیوز دکھا کر تفتیش کرنا ہے۔ جج سکندر خان نے استفسار کیا کہ جوڈیشل کمپلکس میں کوئی کمرہ موجود نہیں جہاں شامل تفتیش کر لیں۔پراسیکیوٹر نے بتایا کہ جوڈیشل کمپلیکس میں ایسی کوئی سہولت موجود نہیں۔عدالت کی جانب سے طلب کرنے پر جوڈیشل کمپلکس کے رجسٹرار سجاد علی عدالت کے روبرو پیش ہوئے اور عمران خان کو شامل تفتیش کرنے کی غرض سے کمرہ فراہم کرنے کی یقین دہانی کرادی۔جس کے بعد عدالت نے تھانہ مارگلہ میں درج مقدمہ میں نامزد چیئرمین پی ٹی آئی کی ضمانت میں 4 جولائی تک توسیع کرتے ہوئے عمران خان کو شامل تفتیش ہونے کی ہدایت کردی۔

انسدادِ دہشت گردی عدالت سےجوڈیشل کمپلیکس ہنگامہ آرائی پر چیئرمین پی ٹی آئی کی ضمانت پانچ کیسز میں کنفرم ہوئی۔ہنگامہ آرائی کے تین مقدمات میں ان کی ضمانت میں چار جولائی تک توسیع کر دی گئی۔احتساب عدالت نے چیئرمین تحریک انصاف عمران خان اور ان کی اہلیہ بشری بی بی کی القادر ٹرسٹ کیس میں عبوری ضمانت 4 جولائی تک منظور کر لی۔القادر ٹرسٹ کیس میں چیئرمین تحریک انصاف عمران خان اور ان کی اہلیہ بشری بی بی کی درخواست ضمانت پر سماعت احتساب عدالت اسلام آباد کے جج محمد بشیر نے کی۔عدالت نے بشری بی بی کی 5 لاکھ کے ضمانتی مچلکوں کے عوض ضمانت منظور کر لی۔ عمران خان کی ضمانت میں بھی 4 جولائی تک توسیع کر دی گئی۔ڈسٹرکٹ اینڈ سیشن عدالت نے توشہ خانہ جعلسازی کے مقدمہ میں بھی بشری بی بی کی ضمانت 4 جولائی تک منظور کر لی۔ایڈیشنل سیشن جج طاہر عباس سپرا نے عبوری ضمانت منظور کی۔