فطرت اور ماحول ۔۔۔ حافظ سعید احمد سعود

انسان جُثّے تے روح ناں مرکّب آ۔ اِس واستے ضروری آ جے جسم نے نال نال روح نی خوراک ناں وی خیال رکھیا گَچھّے۔ انسانی روح ایمان، انسان دوستی، ماحول دوستی، اعلی انسانی قدراں نی پاسداری تے تَقوٰی اختیار کرنے نال بَل (صحت مند) رہی سَکنی۔

انسان کی "اَحسنِ تَقویم” بنایا گا۔ اوہ اپنے مرتبے توڑی (تک) اُسے ویلے پوہچی سَکناں جے اوہ جُثّے تے روح دآں کی صحت مند رَکھّے۔ اَج ناں انسان سرمایہ دارانہ نظام نَیں زیرِ اَثر مادیت پرستی نَیں کَینسر ناں شکار ہوئی گا۔ اُس نی ساری توجہ جُثّے نی آرائش تے آسائش اُپّر ای تے اُس روح کی مکمل طور اُپّر نظر انداز کَری شوڑیا۔

انسان تے فطرت نَیں وچ جیہڑا تعلّق آ اوہ بَہوّں اہم آ۔ انسان کی کًدے اَحسنِ تَقویم آخیا گا تے جِیہڑا ماحول اُس کی ودیعت کِیتا گا آخر اُس نی وی تے کوئی اہمیت ہوسی۔ پر سامراج انساناں نے بجائے مال و اسباب تے جبر و اختیار کی اہمیت دیئی تے منفی سائنسی ترقی کی رواج دِتّا۔ طاقت وَر مُلخاں کمزور مُلخاں نَیں وسائل اُپّر قبضہ کَری کِہندا۔ انسان اپنا مقام تے اوقات پُہلّی تے حیوانات نی صف وچ شامل ہوئی گا بلکن شاید پاتال وچ ٹَیہی پَیئا۔

برادرِ عزیز حافظ سعید احمد سعود نی کتاب "فِطرت اور ماحول” بَہوّں اہم کتاب ای۔ اِس وچ قرآنی احکامات تے اُسوہِ رسول رحمتﷺ نی لَوئی (روشنی) وِچ ماحول نی اہمیت دَسّی گئی۔ نال یے اج نَیں انساناں کی سامراج نی انسان دشمنی تے وسائلِ انسانی اُپّر غاصبانہ قبضے تے اِس نَیں انجام سی وی خبردار کِیتا گا۔

حافظ سعید احمد سعود ناں انداز تحریر مقررانہ آ۔ اِسرے لگناں جِیئاں اوہ مَجمعے نَیں سامنے بیٹھے گَلّاں بانَیں اے۔ اُنھاں نِیاں لِختاں نی خاص گَل یاء ای جے اوہ سوال اُٹھانیاں۔ پڑھے لِخے تے باشعور لوکاں ناں فرض وی اِیہے آ جے اوہ نَویاں نسلاں کی اَنّہھی (اندھی) تقلید نے بجائے سوال اٹھانے ناں حوصلہ دین۔ اِس طرحے تفکّر تے تدبّر ناں ماحول پیدا ہوسی تے سوال اٹھانے والی نَویں نسل کل جواب لَوڑنے تے فر اس کی عام کرنے نَیں عمل وچ شریک ہوئی گیسی۔