عمران خان کی رہائی تک احتجاج کا حلف

عارف علوی نے پشاور میں کارکنوں سے عمران خان کی رہائی تک احتجاج کا حلف لے لیا

سابق صدر عارف علوی نے پشاور میں پی ٹی آئی کارکنوں سے عمران خان کی رہائی تک احتجاج کا حلف لے لیا۔

پشاور میں سابق صدر عارف علوی نے پی ٹی آئی ورکرز کنونشن سے خطاب کرتے ہوئے کہا کہ آج عمران خان ہر پاکستانی کے سینے میں دل بن کر دھڑک رہا ہے، ہمارے دل نوچ کر ہی بانی پی ٹی آئی کی محبت ختم کی جا سکتی ہے۔

عارف علوی نے کہا کہ بانی پی ٹی آئی کی جدوجہد آئین، قانون اورجمہوریت کی سربلندی کے لیے ہے، جدوجہد کی پاداش میں آج عمران خان ناکردہ گناہ میں پابند سلاسل ہیں۔

سابق صدر کا کہنا تھا کہ24 نومبر کو اسلام آباد کی جانب عوام کا سیلاب رواں دواں ہوگا۔

پی ٹی آئی ورکرز کنونشن میں عارف علوی نے کارکنوں سے بانی پی ٹی آئی عمران خان کی رہائی تک احتجاج کا حلف بھی لیا۔

عارف علوی نے بتایا کہ میں عمران خان کو منع کررہا تھا کہ اسمبلیوں سے استعفیٰ نہ دو، جب لوگوں نے پی ٹی آئی کو ووٹ دیا تو میں سمجھ گیا کہ میں غلط تھا ، جس کو عوام سے محبت ہے ریاست مدینہ کی بات کرتا ہے وہ نفرتیں پالنے والا نہیں۔

انہوں نے کہا کہ ساری بیورکریسی بے ایمانی کررہی ہے، سب مل کر لوٹ مار کر رہے ہیں۔