جنرل (ر) فیض حمید کے بھائی کے گھر سے کیا کیا چوری ہوا؟
گھریلو ملازم ایک کروڑ سے زائد نقدی کے علاوہ قیمتی موبائل فون بھی لے اڑے
آئی ایس آئی کے سابق سربراہ لفیٹیننٹ جنرل (ر) فیض حمید کے بھائی نجف حمید کے گھر بڑی چوری ہوگئی ،جس میں ایک کروڑ سے زائد نقدی کے علاوہ دیگر اشیا بھی چوری کر لی گئیں۔
پولیس کے مطابق چکوال میں نجف حمید کے گھر چوری کی واردات کسی اور نے نہیں بلکہ گھر کے ملازمین نے کیا اور واردات کا مقدمہ گھریلو ملازمین کے خلاف تھانہ نیلہ میں درج کرلیا گیا ہے۔
نجف حمید کی جانب سے پولیس کو دیے گئے بیان میں بتایا گیا ہے کہ ملازمین ایک کروڑ7 لاکھ روپے نقد اور ایک آئی فون 13 پرو موبائل لے گئے۔
نجف حمید نے کہا کہ وہ وقوعہ کے روز علاج کے لیے لاہور گئے تھے، واپس آئے تو سیف سے ایک کروڑ 7 لاکھ روپے نقدی سمیت میرا قیمتی موبائل فون بھی غائب تھا۔ واضح رہے کہ نجف حمید سابق ڈی جی آئی ایس آئی جنرل ر فیض حمید کے بھائی ہونے کے علاوہ محکمہ مال کے ملازم اور گرداور کے عہدے پر کام کرتے رہے ہیں۔