بھارت سے فلڈ وارننگ، دریائے ستلج کے اضلاع میں ہائی الرٹ

تحصیل شجاع آباد اور جلالپور پیروالا کی متعدد بستیاں زیر آب آچکی ہیں اور مقامی آبادی مشکلات کا شکار ہے۔ جھنگ کی چاروں تحصیلوں میں بھی کئی دیہات ڈوب گئے ہیں، جہاں متاثرین کو محفوظ مقامات پر منتقل کرنے کا عمل جاری ہے۔ اب تک تقریباً 285 دیہات پانی کی زد میں ہیں۔

سیلاب سے پنجاب کے مختلف اضلاع میں مجموعی طور پر 3900 سے زائد دیہات متاثر ہوئے، 39 لاکھ سے زیادہ افراد متاثر جبکہ 50 کے قریب ہلاکتیں رپورٹ ہوچکی ہیں۔ 18 ہزار افراد کو محفوظ مقامات پر منتقل کیا گیا ہے۔

فلڈ فورکاسٹنگ ڈویژن کے مطابق دریائے ستلج، راوی اور چناب کے مختلف مقامات پر اونچے درجے کا سیلاب ہے، جبکہ تونسہ اور ڈیرہ غازی خان کے کچے کے علاقوں میں پانی کے ساتھ ساتھ تیز کٹاؤ بھی جاری ہے جس سے زرعی اراضی کو شدید نقصان پہنچ رہا ہے۔

انتظامیہ کے مطابق سیلاب متاثرہ علاقوں میں کھانے، مویشیوں کے لیے چارہ اور طبی سہولیات فراہم کی جا رہی ہیں، تاہم کئی مقامات پر لوگ اب بھی پانی میں محصور ہیں اور آمدورفت کے لیے کشتیوں کا استعمال کر رہے ہیں۔