5 روزہ دورہ چین مکمل.وزیراعظم شہباز شریف وطن پہنچ گئے

وزیر اعظم شہباز شریف اپنا 5 روزہ دورہ چین کی تکمیل کے بعد پاکستان پہنچ گئے۔

اس حوالے سے سماجی رابطے کی ویب سائٹ ایکس پر اپنے پیغام میں وزیر اعظم نے چین میں شاندار اور نتیجہ خیز دورے کے دوران گرم جوشی سے مہمان نوازی کے لیے چینی عوام اور حکومت کا شکریہ اداکیا۔

اُن کا کہنا تھا  کہ صدر شی جن پنگ کی دور اندیش قیادت میں چین نئی بلندیوں کو چھو رہا ہے . پاکستان اور چین کی دوستی بے مثال ہے، دونوں ملکوں کو آئرن برادرز ہونے پر فخر ہے۔

اپنے پیغام میں شہباز شریف نےمزید  کہا کہ اُن کا دورہ  پاکستان اور چین کے تعلقات کی مضبوطی، تجارتی تعلقات و سٹریٹجک شراکت داری اور سی پیک کے دوسرے مرحلے کے آغاز کے حوالے سے اہم سنگ میل ثابت ہوا۔ سی پیک کے دوسرے مرحلے کے تحت چینی کاروباری شخصیات و سرمایہ کاروں کی پاکستانی کاروباری شخصیات اور سرمایہ کاروں سے ملاقات ہوئی۔

وزیرِ اعظم نے کہا کہ چین کی انفارمیشن ٹیکنالوجی، زراعت، معدنیات و دیگر شعبوں میں ترقی قابل تقلید ہے،اور پاک چین  اقتصادی شراکت داری سے دونوں ملکوں کے عوام مستفید ہوں گے۔ حالیہ دورہ چین کے دوران ہونے والی مثبت پیش رفت کے اثرات طویل مدت تک قائم رہیں گے،

واضح رہے کہ وزیراعظم کے دورہ چین کے دوران دونوں ملکوں کے درمیان متعدد معاہدوں پر دستخط کیے گئے .پاکستان روانہ ہوتے وقت چینی صوبے شی آن کے گورنر چَھن چُھن جیانگ، اعلیٰ چینی و پاکستانی سفارتی اہلکاروں نے وزیرِ اعظم کو الوادع کیا.

Prime Minister Shahbaz Sharif is back from China,وزیراعظم شہباز شریف وطن پہنچ گئے