نعت نذرانہ

پاکاں نی تعریف نا سودا کِیتا میں
دُنیا پاسوں ایہ دل بِیہلا کِیتا میں

گَل چِھڑی تے یک شڑَکّا کِیتا میں
ذکر اُنھاں نا مصرع مصرع کِیتا میں

پڑھی پڑھی تے نعتاں پہھیجیاں اُس پاسے
لفظاں کی دل کھولی شِِیرا کِیتا میں

جے اُس سوہنے ناں نی تسبیح نِینہ کِیتی
رَجّی تے فِر اپنا کہھاٹا کِیتا میں

صِفتاں پاک نبیؐ نِیاں کِِیتیاں اَکھراں وچ
اِیہے کَم سا جیہڑا چَنگا کِیتا میں

پاک نبیؐ نی یاد نے موتی رکھنے تَئیں
اپنے دل نا پہھانڈا سَخنا کِیتا میں

رب راضی ہونا اس پاک وسیلے نال
ایہ سوچی اوہ پاک وسیلہ کیتا میں

جسلے پاک نبیؐ نے وصف لِخے واصؔف
فیر کدے نِینہ لفظ نا صَرفہ کِیتا میں

عبدالرحمان واصف

کہوٹہ