وزارت عظمی کا تاج انوار الحق کاکڑ کے سر سج گیا

نگراں وزارت عظمی کا تاج بلوچستان سے تعلق رکھنے والے سابق سینیٹر انوار الحق کاکڑ کے سر سج گیا۔ اس حوالے سے ہفتے کے روز وزیراعظم شہباز شریف اور اپوزیشن لیڈر راجہ ریاض کے درمیان اتفاق رائے کے بعد طے پایا ہے کہ انوار الحق کاکڑ نگران دور کے لیے وزیراعظم ہوں گے ۔

وزیر اعظم شہباز شریف نے انوار الحق کاکڑ کو نگراں وزیر اعظم مقرر کرنے کی سمری وزیر اعظم کو بھجوا دی ہے۔
نامزد نگراں وزیر اعظم کا تعلق بلوچستان عوامی پارٹی سے ہے ۔

انوار الحق کاکڑ ۔۔ فائل فوٹو

نیک نام شہرت کے حامل انوار الحق کاکڑ تقریبا تمام حلقوں کے لیے قابل قبول ہیں ۔وہ بلوچستان حکومت کے ترجمان رہنے کے علاوہ چھ برس تک سینیٹر بھی رہے ہیں اور تمام سیاسی جماعتوں کی قیادت کے ساتھ ان کا اچھا تعلق رہا ہے۔
انوار الحق کاکڑ ایک اعٰی تعلیم یافتہ اور سنجیدہ پارلیمنٹیرین کی شہرت رکھتے ہیں جو اہم ملکی معاملات پر متوازن نقطہ نظر رکھتے ہیں۔مبصرین کے مطابق وہ حکومت اور اسٹیبلشمنٹ کے درمیان توازن کے ساتھ ورکنگ ریلیشن شپ آگے بڑھانے کی صلاحیت رکھتے ہیں۔

بعض ذرائع کا دعوٰی ہے کہ انوارالحق کاکڑ کا نام بطور نگراں وزیراعظم ایک ماہ سے ذیر غور تھا، جبکہ اس دوران شاہد خاقان عباسی، اسحاق ڈار، حفیظ شیخ،صادق سنجرانی ، جلیل عباس جیلانی سمیت کئی نام نگراں وزیر اعظم کے امیدوار کے طور پر سامنے آئے، تاہم اس طویل کشمکش کا ڈراپ سین انوارالحق کی نامزدگی کی صورت میں سامنے آیا ہے، جسے قومی سیاست کے مستقبل کیلئے خوش آئند قرار دیا جا رہا ہے۔