مینگورہ میں ٹارگٹ کلنگ،2پولیس اہلکار،سیکیورٹی گارڈ شہید

واقعے کے حوالے سے ایڈیشنل ایس پی سوات فرمان اللہ اور ڈی ایس پی سیدوشریف سرکل عطاء اللہ نے میڈیا کو بتایا کہ مینگورہ تھانے میں  تعینات دو پولیس اہلکاروں عمران خان اوراشرف علی سبزی منڈی کے قریب معمول کی ڈیوٹی پر تعینات تھے کہ جمعرات کی صبح تین نامعلوم مسلح افراد نے ان پر فائرکھول دیا، سرپر گولیاں لگنے سے دونوں پولیس اہلکارموقع پر ہی شہید ہوگئے جبکہ نجی بینک کے سیکیورٹی گارڈ موسیٰ خان سکنہ سنگوٹہ شدید زخمی ہوگیا، لاشوں اور زخمی گارڈ کو سیدوشریف اسپتال منتقل کردیا گیا،جہاں موسیٰ خان بھی زخموں کی تاب نہ لاتے ہوئے چل بسا۔

بعدازاں شہید پولیس اہلکاروں کے لواحقین اور اہل علاقہ نے لاشیں سیدوشریف روڈ پر رکھ کر شدید احتجاج شروع کیا اورلاشوں کو کچہری چوک لے جاکر دھرنادیا ۔ مظاہرین نے  پولیس کی ٹارگٹ کلنگ میں ملوث ملزمان کی فوری گرفتاری کا مطالبہ کیا،بعدازاں پولیس حکام اور انتظامی افسران نے مظاہرین کے ساتھ مذاکرات کئے اور ان کی یقین دہانی پر مظاہرین نے احتجاج ختم کردیا۔

سی سی ٹی وی فوٹیجز سامنے آگئی

واقعے کی سی سی ٹی وی فوٹیجز میں ملزمان کو پولیس اہلکاروں پر فائرنگ اور مارکیٹ کی طرف بھاگتے دیکھا جاسکتا ہے۔
دستیاب  فوٹیجز میں دیکھا جاسکتا ہے کہ تین ملزمان ڈیوٹی پر مامور پولیس اہلکاروں پر اچانک فائرنگ کرنے کے بعد ایک مارکیٹ میں گلی کی طرف بھاگ جاتے ہیں۔ پولیس کے مطابق واقعے سمیت مختلف مقامات پر سے تفتیشی ٹیم نے سی سی ٹی وی فوٹیجز حاصل کرلی ہیں اور حملہ آوروں کا تعاقب کیا جارہا ہے۔