آئی ایم ایف سے معاملات طے پانے کیلئے وزیر اعظم پر امید

وزیراعظم شہباز شریف نے امید ظاہر کی ہے کہ عالمی مالیاتی ادارے آئی ایم ایف کے ساتھ معاملات خوش اسلوبی سے طے پا جائیں گے کیونکہ ہم اس کی تمام تر شرائط پوری کر چکے ہیں۔ترک میڈیا سے گفتگو میں وزیراعظم شہباز شریف نے اس امید کا اظہار کیا کہ آئی ایم ایف کے ساتھ معاملات اسی ماہ طے پاسکتے ہیں ۔
شہباز شریف نے صدر رجب طیب اردوان کو تیسری بار منتخب ہونے پر مبارک باد پیش کرتے ہوئے کہا کہ اس پر پاکستان کے عوام بھی بے حد خوش ہیں ۔ان کا کہنا تھا کہ گذشتہ سال سیلاب سے تین کروڑ پاکستانی متاثر ہوئے اور بڑے پیمانے پر فصلوں کو بھی نقصان پہنچا تاہم اس دوران ترکیہ کے عوام نے دل کھول کر پاکستانیوں کی مدد کی جس پر ہم ان کے شکرگزار ہیں۔عمران خان کی گرفتاری کے حوالے سے سوال پر شہباز شریف نے کہا کہ وہ کسی اور الزام کے تحت نہیں بلکہ بدعنوانی کے الزام میں گرفتار ہوئے جس کے بعد منصوبہ بندی کے تحت فوجی تنصیبات اور سرکاری املاک پر حملے کیے گئے۔جو لوگ بھی ان حملوں میں ملوث ہیں قانون ان کے خلاف قانون حرکت میں آئے گا اور جس پر جتنا سنگین الزام ثابت ہو گا اسی کے مطابق اس کو سزا دی جائے گی۔