شاہ محمود عدالتی حکم پررہا۔تحریک انصاف کی قیادت سنبھالیں گے؟

تمہیں یاد ہو کہ نہ یاد ہو

تحریک انصاف کی حکومت کے دوران دونوں رہنماؤں کے درمیان شدید کشمکش جاری رہی اور عام پارٹی کارکن بھی جانتا تھا کہ شاہ محمود قریشی اور جہانگیر ترین کی سربراہی میں دو گروپ علیحدہ علیحدہ کام کر رہے ہیں۔ بعد ازاں عدالت کی جانب سے جہانگیر ترین کی نااہلی کا فیصلہ آنے کے بعد شاہ محمود قریشی کا راستہ صاف ہو گیا ،جبکہ تحریک انصاف کے سربراہ اور اس وقت کے وزیراعظم عمران خان نے بھی اپنا وزن ان کے پلڑے میں ڈال دیا اور جہانگیر ترین پارٹی کو خیرباد کہہ کر گھر بیٹھ گئے تھے۔ اب وہ ایک بار پھر تحریک انصاف کے منحرفین کے گروپ کی قیادت کر رہے ہیں مگر اس گروپ میں محمود قریشی کی شمولیت کا بظاہر کوئی امکان دکھائی نہیں دیتا۔
ذرائع کا کہنا ہے کہ شاہ محمود قریشی تحریک انصاف کی قیادت سنبھالنے کے خواہشمند واحد امیدوار نہیں ہیں بلکہ اس حوالے سے دو تین اور لوگ بھی سرگرم ہیں۔  حال ہی میں تحریک انصاف سے منحرف ہونے والے فیاض چوہان نےگزشتہ روز انکشاف کیاکہ شاہ محمود قریشی کے علاوہ ان کی اہلیہ بھی تحریک انصاف کی قیادت سنبھالنے کی خواہش مند ہیں ، جبکہ اس دوڑ میں عمران خان کی ہمشیرہ بھی شامل ہوگئی ہیں ۔ اس کے علاوہ جارحانہ سیاسی طرز عمل اختیار کرنے والے عمران خان کے بھانجے حسان نیازی بھی پارٹی کی قیادت کے امیدوار ہیں جو لاہور کے جناح ہاؤس پر حملے اور جلاؤ گھیراؤ کے کیس میں پولیس کو مطلوب اور روپوش ہپیں۔ تاہم فی الوقت یہ نہیں کہا جا سکتا کہ ان میں سے کون اپنے خوابوں کو عملی تعبیر دے سکے گا البتہ موجودہ حالات میں شام محمود قریشی ہی اس عہدے کے لیے موزوں تصور کیے جا رہے ہیں بشرطیکہ عمران خان کسی وجہ سے قیادت سنبھالنے کے اہل نہ رہیں۔

شاہ محمود قریشی عدالتی حکم پر رہا

لاہور ہائی کورٹ راولپنڈی بینچ نے پی ٹی آئی کے وائس چیئرمین شاہ محمودقریشی کو فوری رہاکرنے کا حکم دے دیا جس کے بعد انہیں رہا کر دیا گیا۔لاہور ہائی کورٹ راولپنڈی بینچ میں کیس کی سماعت کے سلسلے میں شاہ محمودقریشی کی جانب سے وکیل تیمور ملک اور ان کی بیٹی گوہربانو قریشی عدالت میں پیش ہوئے جبکہ سرکار کی طرف سے اسسٹنٹ ایڈووکیٹ جنرل عابد عزیز راجوری پیش ہوئے۔

عدالت نے شاہ محمود کی فوری رہائی کا حکم دیتے ہوئے کہا کہ انہیں کسی اور ایم پی او آرڈرکے تحت گرفتار نہ کیا جائے۔عدالت نے ڈی سی راولپنڈی کے تھری ایم پی او آرڈر کالعدم قرار دے دیے اور شاہ محمود قریشی سے کسی قسم کا شورٹی بانڈ جمع کرانے کی ہدایت نہیں کی۔واضح رہےکہ شاہ محمود قریشی کو 9 مئی کے بعد تھری ایم پی او کے تحت گرفتار کیا گیا تھا اور ان کی اسلام آباد ہائی کورٹ کے حکم پر 23 مئی کو رہائی عمل میں آئی تھی لیکن اڈیالہ جیل سے رہائی کے بعد انہیں ایک بار پھر پولیس نے گرفتار کرلیا۔