23 اپریل۔۔۔ کتاب ناں عالمی تیہاڑا

کتاب ناں جگتی تیہاڑا — 23 اپریل

امریکہ تے ولایت سی علاوے جَگتی طور اُپّر اَج کتاباں ناں تیہاڑا منایا گَشناں آ۔ کتاب انسان نی اوہ سَچی سَنگی ای جیہڑی نانہہ خودغرضی ناں مظاہرہ کرنی، نانہہ تَہوخا دَینی تے نانہہ ہے سَنگ چھوڑنی۔

میڈیا تے ڈیجیٹل دنیا نی بالا دستی نَیں دَور وچ کتاب بینی ناں رُجحان بَہوّں کَہٹ ہوئی گا۔ ہر باشعور آدمی نی ذمہ داری جے اوہ کتاب نی اہمیت ناں شعور عام کرے۔

کتاب نی اہمیت کَدے کَہٹ نَیہی ہوئی سَکنی۔ کتاب اَساں کی علم نی لَوء دَینی تے ساہڑی تربیت کَرنی۔ کتاب نیں ذریعے اَساں اَن ڈِٹھّی دُنیا دِکھنے آں تے نَویں نَویں تصوّرات سی واقفیت حاصل کرنے آں۔

کتاب اَساں کی لَکھّاں سال پرانی انسانی تاریخ تے تہذیب نال روشناس کرایا۔ اَساں ماضی نی تاریخ کی سامنے رَکھی تے حال کی بہتر بنائی سَکنے آں تے مستقبل واستے منصوبہ بندی کَری سَکنے آں۔

کتاب اَساں وچ تنقیدی شعور بیدار کَرنی تے تخلیقیت کی فروغ دَینی۔ اَساں کتاب نال تَرُٹّا وہاء تعلّق جوڑی تے اَپنیاں نَویاں نسلاں کی مطالعہ، غور و فکر، لِخنے لکھانے تے دُنیاں تک اپنی تاریخ تے ثقافت پوہچانے نی راہ پَدری کَری سَکنے آں۔

کتاب انفرادی کامیابی، معاشرتی ترقی تے مجموعی ماحول نی بہتری واستے اہم ترین ہتھیار آ۔ یوء تیہاڑا منانے ناں بہترین طریقہ یوء آ جے اَساں آپوں وی کتاب بینی نَیں عادی بَنیے تے اِس نَیں فروغ واستے وی جُہدی کَریے۔

راشد عباسی