ہزارہ ایکسپریس حادثے میں اموات 25 سےمتجاوز،100 مسافر زخمی

سندھ کے شہر نواب شاہ کے قریب ہزارہ ایکسپریس ٹرین کو پیش انے والے المناک حادثے میں جاں بحق ہونے والے مسافروں کی تعداد 25 سے تجاوز کر گئی ہے جبکہ 100 سے زائد افراد زخمی ہیں جن میں سے متعدد کی حالت تشویش ناک بتائی جا رہی ہے ۔

کراچی سے ہزارہ کے شہر حویلیاں جانے والی ہزارہ ایکسپریس کی 10 بوگیاں اتوار کی دوپہر سرہاری ریلوے اسٹیشن کے قریب پٹڑی سے اتر گئیں جس کے نتیجے میں یہ المناک حادثہ رونما ہوا۔

ریلوے ذرائع کے مطابق 20 افراد کی لاشیں نکال لی گئی ہیں۔سرکاری ذرائع کے مطابق حادثے میں 50 مسافر زخمی ہوئے ہیں۔ ریسکیو آپریشن شروع کر دیا گیا ہے۔ٹرین حادثے میں زخمی ہونے والے افراد کو پیپلز میڈیکل اسپتال منتقل کیا جا رہا ہے۔حادثے کے باعث قریبی اسپتالوں میں ایمرجنسی نافذ کر دی گئی ہے۔

ٹرین حادثے کے بعد امدادی کارروائیاں جاری

ڈی ایس ریلوے محمود الرحمٰن کا کہنا ہے کہ ہزارہ ایکسپریس کو حادثہ سرہاری ریلوے اسٹیشن کے قریب پیش آیا،جس کے بعد لوکوشیڈ روہڑی سے ریلیف ٹرین جائے حادثہ روانہ ہو رہی ہے، حادثے کے باعث اپ ٹریک پر ٹریفک معطل ہے۔

ایدھی فاؤنڈیشن کنٹرول روم کے مطابق حیدرآباد، نواب شاہ، میرپور خاص، سکھر اور قریب کے سینٹروں سے ایدھی کی درجنوں گاڑیاں جائے وقوعہ پر روانہ کی ہیں۔

ریلوے حکام کے مطابق فی الحال حادثے کی وجوہات کے بارے میں معلوم نہیں ہو سکا ہے ، مسافروں کو بوگیوں سے نکالنے کا کام جاری ہے۔ٹرین میں موجود مسافروں کا کہنا ہے کہ ہزارہ ایکسپریس میں بہت زیادہ مسافر سوار تھے ۔

ایس ایس پی سانگھڑ عابد بلوچ نے کہا ہے کہ ٹرین کی بوگیوں میں پھنسے افراد کو نکالنے کی کوشش کی جا رہی ہے، 10 ایس ایچ اوز، 4 ڈی ایس پیز اور 100 سے زائد پولیس اہلکار ریسکیو کے کام میں مصروف ہیں۔

ڈی جی رینجر سندھ میجر جنرل اظہر وقاص کی ہدایت پر رینجرز نفری بھی جائے حادثہ پر روانہ کر دی گئی ہے، فوری ریسکیو کے لیے تربیت یافتہ جوانوں کو جائے حادثہ پر بھیجا گیا ہے، رینجرز ٹیموں کے ہمراہ ایمبولینسز، میڈیکل ایڈ کے علاوہ کھانے کا سامان بھی ہے، رینجر جوان زخمیوں کو فوری اسپتال منتقل کریں گے۔

یاد رہے کہ دو روز قبل پڈ عیدن میں بھی علامہ اقبال ایکسپریس کی دو بوگیاں پٹری سے اتر گئی تھیں۔