کرم فائرنگ میں ملوث عناصر کیخلاف سخت کارروائی کا فیصلہ
لوئر کرم میں کل ہونے والی فائرنگ کے واقعے میں ملوث عناصر کے خلاف سخت ترین کارروائی کا فیصلہ کیا گیا ہے۔
ضلع کرم کی صورتحال پر اعلیٰ سطح کا اجلاس ہوا، اجلاس میں لوئر کرم کے 4 گاؤں اوچت، مندوری، داد کمر اور بگن کو خالی کرانے کا فیصلہ کیا گیا ہے۔
دیہات کو خالی کرنے کا فیصلہ ان علاقوں کے عوام کے جان و مال کے تحفظ کو یقینی بنانے کے لئے ہے تاکہ ان کو کسی قسم کا نقصان نہ پہنچے، ان دیہات کو خالی کروا کے سرچ آپریشنز کیے جائیں گے۔
کے پی حکومت کے مطابق کرم میں ریاست کے خلاف واقعات میں ملوث افراد کو شیڈول فور میں ڈالنے اور بدامنی میں ملوث افراد اور ماسٹر مائنڈز کے سروں کی قیمت مقرر کرنے کا فیصلہ کیا گیا ہے۔
کل کے واقعے کے بعد کرم میں امدادی رقوم کی تقسیم کا سلسلہ وقتی طور پر روک دیا گیا اور کرم میں بنکرز کی مسماری کے سلسلے کو تیزی سے جاری رکھنے کا فیصلہ کیا گیا ہے۔
خیبر پختونخوا حکومت کے مطابق امن معاہدے کے مطابق کرم کو اسلحے سے پاک کرنے کی مہم پر سختی سے عمل پیرا ہونے کا فیصلہ کیا گیا ہے، امن معاہدے کے تحت قائم امن کمیٹیوں کو اپنی ذمہ داریاں ادا کرنا ہوں گی۔