کراچی: مسلح افراد کی فائرنگ سے ڈی ایس پی شہید، اہلکار زخمی

کراچی: مسلح افراد کی فائرنگ سے ڈی ایس پی شہید، اہلکار زخمی
شہر قائد کراچی میں کریم آباد فیصل بازار کے قرین مسلح افراد کی فائرنگ سے ڈی ایس پی شہید اور ایک اہلکار زخمی ہو گیا۔

ریسکیو حکام کے مطابق کریم آباد فیصل بازار کے قریب مسلح افراد نے فائرنگ کی، فائرنگ سے 2 افراد شدید زخمی ہوئے، فائرنگ پولیس اہلکاروں پر کی گئی، فائرنگ میں زخمی افراد کو ہسپتال منتقل کیا گیا جہاں زخموں کی تاب نہ لاتے ہوئے ڈی ایس پی سی ٹی ڈی جان کی بازی ہار گئے جبکہ سی ٹی ڈی آفیسر علی رضا زخمی ہو گئے، سوشل میڈیا رپورٹس پر وزیر داخلہ سندھ نے ڈی آئی جی سی ٹی ڈی اور ایس ایس پی سینٹرل سے رپورٹ طلب کر لی۔

دوسری جانب وزیر داخلہ سندھ ضیاء الحسن لنجار کا کہنا ہے کہ حملے میں ملوث عناصر کی گرفتاری کے لئے فوری اقدامات کئے جائیں، زخمی پولیس آفیسر کے علاج معالجے میں کوئی کسر نہ چھوڑی جائے، کرائم سین پر دستیاب شواہد کو تفتیش کے جملہ امور میں مؤثر اور مربوط بنایا جائے۔

ڈی آئی جی سی ٹی ڈی آصف اعجاز شیخ کا کہنا ہے کہ سی ٹی ڈی افسر کی شہادت کی ابھی تصدیق نہیں کرسکتے، فائرنگ کے معاملے کی تفیصیلات حاصل کی جارہی ہیں، سی ٹی ڈی افسران جائے وقوعہ پر پہنچ گئے ہیں۔

ذرائع کا کہنا ہے کہ شہید ڈی ایس پی کی شناخت علی رضا کے نام سے ہوئی، واقع میں ڈی ایس پی کا گن مین بھی زخمی ہوا، شہید ڈی ایس پی کی لاش اور زخمی اہلکار کو عباسی شہید ہسپتال منتقل کر دیا گیا، شہید ڈی ایس پی علی رضا ولد سید ظفر زیدی کو سر میں گولیاں لگی ہیں جبکہ سیکیورٹی گارڈ وقار ولد احسن شدید زخمی ہوئے۔