پہاڑی افسانہ "فرض نی پچھان”

افسانہ "فرض نی پچھان”

اس نی عمر تری بتی (تیس بتیس) سال ہوئی ہوسی ۔ دکھنے وچ پڑھی لخی، تہذیب یافتہ تے بارعب کڑی سی۔ سرکاری نوکری انج تے گن (صلاحیتیں) رکھنے والے لوکاں کی وی ناکارہ بنائی شوڑنی پر اس نی خوش قسمتی سی جے اس کی ہک تے سکولے وچ پڑھانے ناں موقع لبھا سا تے دووآ یوء سکول دیہاتی علاقے وچ سا۔

گڈی مری سی پنڈی وخ اشنیاں پینڈا جلدی طے کرنی۔ پر ڈرائیور حضرات محفوظ تے محتاط ڈرائیونگ نے بجائے خطرناک ڈرائیونگ کی ترجیح دینے۔  جس نی وجہ نال روز حادثے ہونے جنھاں وچ قیمتی جاناں ضائعیاں ہوئی گشنیاں۔

ہک موڑ مڑنیاں ڈرائیور اگلی گڈی کی اوور ٹیک کیتا۔ ہک دم ساہمنے سی ہک تیز رفتار کار اچھی رہی۔ بریکاں نے چریںکاٹ نی آواز پہاڑاں وچ کافی دیر توڑی گونجنی رہی۔ اللہ ناں فضل سا جے پکی سڑکے نال کچی جآء موجود ایسی تے ڈرائیورے  گڈی سڑکے را ویلے سر کچی جائی وخ موڑی کہندی۔

اس کڑی ڈرائیورے کی آخیا جے اوہ گڈی اتھیں یے کھہلاری شوڑے۔ وہاء گڈی را تھلے الہی گئی۔ موبائل اس نے ہتھے وچ سا۔  ہک بوٹے ہیٹھ کھلی تے وہاء کسے نال فون اپر گل کرنی رہی۔ کنڈیکٹر دو واری اس نے کول گا پر اس ہتھ نے اشارے نال رکنے تائیں آخیا۔

ڈرائیور سواریاں وخ مڑی تے آخن لگا۔ "دکھو ناں جی! یاء روٹ نی گڈی ای۔ ساہڑا ٹائم بدھا وہاء ہونا۔ میں کدے اپنے مقرر ویلے اپر اڈے وچ نانہہ پوہچیا یاں تے مہاڑا نمبر پچھلی گڈی کی لبھی گیسی۔ شہزادی صاحبہ پتہ ناء کس نال گلاں کرے ای لگیاں یاں "۔

سواریاں وچا وی کج لوگ خاتون نی طرف روہے (غصے) نال دکھن لگی پیئے۔ کج لوک نیویں (دھیمی) جیئی آوازے وچ اعتراض وی کرن لگی پیئے "نواب زادی ہوراں کی اتنا کہل یت (تخلیہ) چائیناں سا تے نویکلی (خصوصی، انفرادی) ٹیکسی کرائی کہنن آ”۔

خاتون با رعب انداز نال ٹرنیاں گڈی کول آئی۔  کنڈیکٹر ،جیہڑا باہر کھلتا وہاء سگریٹ چِھکناں سا، گڈی ناں در کھولی شوڑیا پر خاتون ڈرائیور وخ دکھی تے آخیا، "بس پنج منٹ رکی گچھو۔ سارجنٹ صاحب پوہچنے والے۔ اوہ اپنی کاروائی کری تے تساں کی گشنے نی اجازت دیسن”۔

ڈرائیور نے نال نال سواریاں نے چہریاں اپر وی ناگواری ناں ڈوہنغا تاثر نظری اچھن لگی پیئا۔ ایک بڈھیر تے باقاعدہ چنگا مندا آخن لگی پیئے۔ "اساں کتنا چر ہوئی گا تے اس نے سارجنٹ صاحب اشنے نیس۔ بڑی آئی کسے نوابے نی تیہہ” پر وہاء کڑی فر گچھی بوٹے ہیٹھ کھلی ریئی۔

میکی اس نی پہادری اپر حریانی تے ہوئی پر نال نال خوشی وی ہوئی جے ساہڑے معاشرے وچ وی اجیئے لوک موجود اے جیہڑے قانون تروڑنے والیاں نے خلاف عملی کردار ادا کرنے۔ میں اس کی شاباش دتی۔ وہاء آخن لگی ۔۔۔۔

"سر میں ہک استانی یاں۔ میں یوء شعبہ اپنی مرضی نال چنیا سا۔ میں اس کی نوکری نیئیں بلکن عبادت سمجھنی یاں۔ میں بچیاں کی پڑھانی یاں جے چنگا معاشرہ بنانے واستے اساں وچا ہر فرد کی جہدی کرنی پیسی۔ غلط کی ہمیشاں غلط آخو تے ظلم، زیادتی تے غلط کم کی روکو پہانویں کیاں نانہہ سارے لوک تساں نے مخالف ہون۔ یوء ملخ ساہڑا آ۔ یوء ساہڑا کہر (گھر) آ۔ اس نے قانون ناں احترام اساں اپر فرض آ۔ کدے کوئی قانون تروڑناں تے جتنا ساہڑے بس وچ ویہہ اساں اس نے خلاف احتجاج کراں۔  اتھیں تے مسئلہ دو درجن انسانی جاناں ناں۔ انھاں سواریاں کی یاء گل سمجھ نیہی اشنی جے غیر محتاط تے خطرناک ڈرائیونگ کرنے والے ڈرائیور انھاں نی جانی نے دشمن اے۔ ایہہ اپنے چند ٹکیاں تائیں انسانی جاناں کی داء اپر لانے اے۔ ایہے جیئے قانون تروڑنے والے ڈرائیور قاتل اے”۔

اسے ویلے سارجنٹ ہوراں نی موٹر سائیکل ہارن بجانی دووئے موڑے اپرا ساہمنے آئی۔  انھاں گڈی کول اچھی بریک ماری۔ اساں دآں (دونوں) وی گڈی کول اچھی انھاں نال دعا سلام کیتی۔  سارجنٹ صاحب خاتون ناں بہوں شکریہ ادا کیتا تے شاباش وی دتی نیں۔  ڈرائیور کولا انھاں گڈی نے کاغذ کہندے۔

چلان بک کڈھی تے اوہ تھوڑی دیر ہک ورقے اپر کج لیکنے (لکھتے) رہے۔ فر ورقہ پھاڑی تے ڈرائیور نے ہتھے وچ دتا نیں تے کاغذ موٹر سائیکل نے نال لگے ہوئے بکسے وچ بائی شوڑے نیں۔ سارجنٹ ہوراں وائرلیس اپر کسے کی حکم دتا۔۔۔

"گڈی نمبر۔۔۔۔۔۔۔ دو ہفتے تائیں بند ہوئی گی تے چالیہہ (چالیس) ہزار روپے جریمانہ وہاء ۔ ڈرائیور فیض آباد سواریاں چھوڑی تے گڈی تھانے وچ کھلیارسی (کھڑی کرے گا)۔ گڈی تھانے پوہچے تے میکی اطلاع دینی آ”۔

راشد عباسی