نواز شریف پر الزامات لگانے والے سے برطانوی پولیس کی تفتیش

مسلم لیگ ن کے قائد  اور سابق وزیر اعظم نواز شریف پر الزامات لگانے وقلے شخص تسنیم حیدر سے کاؤنٹر ٹیررازم پولیس لندن نےتفتیش کی ہے۔

ذرائع کے مطابق کاؤنٹر ٹیررازم پولیس کے دو افسران نے تسنیم حیدر سے کافی دیر تک پوچھ گچھ کی، اور مختلف سوالات کی صورت میں تسنیم حیدر کا کم و بیش چارگھنٹے کا انٹرویو کیا گیا، جبکہ برطانوی تفتیشی قوانین کے عین مطابق  انٹرویو کی ویڈیو ریکارڈنگ کی گئی۔

ذرائع کا کہنا ہے کہ اس دوران تسنیم حیدر کی سہولت کیلئے مترجم بھی فراہم کیا گیا، تفتشی ذرائع کا دعوٰی ہے کہ انٹرویو کا سکرپٹ تسنیم حیدر کو دکھا کر اس سے دستخط لئےجائیں گے،جبکہ  انٹرویو کے حوالے سےدستاویز مکمل ہونے کے بعد پولیس  اس سلسلے میں دیگر متعلقہ افراد سے رابطہ کرے گی اور ضرورت پڑنے پر ان سے سوال جواب کئے جائیں گے ۔

واضح رہے کہ برطانیہ میں مقیم پاکستانی تسنیم حیدر نے سابق وزیراعظم نوازشریف اور دیگر پر سینئر صحافی ارشد شریف کے کینیا میں ہونے والے قتل کی سازش کا الزام عائد کیا تھا اور ان انکشافات پر پاکستان اور بیرون ملک سیاسی قو صحافتی حلقوں میں کھلبلی مچ گئی تھی۔